އެފްއޭއެމްގެ މުވައްޒިފަކު ކޯވިޑަށް ޕޮޒިޓިވްވެ ކޮންގްރެސްގައާއި، ޕްރެސް ކޮންފަރެންސްގައި ބައިވެރިވި މީހުން 14 ދުވަހަށް ކަރަންޓީން ވުމަށް އެޗްޕީއޭއިން އަންގަން ފަށައިފިއެވެ.

އެޗްޕީއޭއިން މިހާރު ދަނީ އެފްއޭމްއިން މުވައްޒިފަކު ޕޮޒިޓިވްވުމާއި ގުޅިގެން އޭނާއާއި ދިމާވި މީހުން ކަރަންޓީން ވުމަށް އަންގަމުންނެވެ. ޕޮޒިޓީވި މުވައްޒިފުވަނީ އެފްއޭއެމްއިން ބޭއްވި ކޮންގްރެސްގައާއި، ޕްރެސްގައިވެސް ބައިވެރިވި މުވައްޒިފެކެވެ. އޭނާ ޕޮޒިޓިވްވުމާއި ގުޅިގެން މިހާރުވަނީ ކަރަންޓީން ފެސިލިޓީއަށް ގެންގޮސްފައެވެ.

ޕޮޒިޓިވްވި މީހާއާއި ސީދާ ދިމާވި މީހުންނަށް 14 ދުވަހަށް ގޭގައި މަޑުކުރަން އަންގާފައިވަނީ އިއްޔެއިން ފެށިގެންނެވެ. ގޭގައި މަޑު ކުރަން އެންގި މީހުންގެ ތެރޭގައި ޕްރެސްގައި ބައިވެރިވި ނޫސްވެރިންވެސް ހިމެނެއެވެ. ކޯވިޑް19 އަށް މީހަކު ޕޮޒިޓިވްވެއްޖެނަމަ ޕޮޒިޓިވްވާ މީހާއާއި ސީދާ ދިމާވާ މީހުން 14 ދުވަހުގެ ކަރަންޓީންގައި ތިބެންޖެހޭނެ ކަމަށް އެޗްޕީއޭއިން ވަނީ ކަނޑައަޅާފައެވެ.

މާލެ ސަރައްހައްދުގައި ކޯވިޑްގެ ނުރައްކާ އަދިވެސް ބޮޑުއިރު، އެންމެ ގިނަބަޔަކު ހިދުމަތް ހޯދަމުންދާ އައިޖީއެމްއެޗުން ބަޔަކު ޕޮޒިޓިވްވެ އެތަނުގައިވެސް ވަނީ ފިޔަވަޅުތައް ވަރުގަދަކޮށްފައެވެ.