ދޮޅު މަސްދުވަހުގެ ބޮޑު ޗުއްޓީއަކަށް ފަހު މިއަހަރުގެ ދިރާސީ އާ އަހަރުގެ ކިޔެވުން މިއަދު ފަށައިފިއެވެ.

މިއަހަރުގެ ދިރާސީ އަހަރު ފެށިއިރު 84،000 އަށް ވުރެ ގިނަ ދަރިވަރުން ސްކޫލްތަކުގައި ކިޔަވަމުންދާނެކަމަށް އެޑިއުކެޝަން މިނިސްޓްރީން ބުނެއެވެ. އަދި މުޅިން އަލަށް 3 ސްކޫލެއް ހުޅުވައި ކިޔަވައިދޭން ފަށާނެކަމަށްވެސް އެމިނިސްޓްރީން ބުނެއެވެ.

އެއީ ހުޅުމާލޭ ދެވަނަ ފިޔަވަހީގައި ހަދާފައިވާ ޞަލާޙުއްދީން ސްކޫލާއި، ހުޅުމާލޭ ފުރަތަމަ ފިޔަވަހީގައި ހުޅުވާފައިވާ ސީއެޗްއެސްސީގެ އައު ޢިމާރާތާއި، މާލޭގައި ހުޅުވާފައިވާ ދަރުމަވަންތަ ސްކޫލްގެ އައު ޢިމާރާތެވެ.

މިދިރާސީ އަހަރު ރާއްޖޭގެ ސްކޫލުތަކުގައި ކިޔަވަމުން އަންނަ 84،000 ދަރިވަރުންގެތެރެއިން ސަރުކާރުގެ ސްކޫލްތަކުގައި 73،000 ދަރިވަރުން ކިޔަވާނެއެވެ. އަދި 25,000 އަށް ވުރެ ގިނަ ކުދިން ކިޔަވާނީ މާލެ ސަރަޙައްދުގެ ސްކޫލްތަކުގައެވެ. މިއަހަރު މުޅިން އަލަށް 7،000 ދަރިވަރުން ގްރޭޑް އެކަކަށް ވައްދާފައިވެއެވެ. އޭގެ ތެރެއިން މާލެ ސަރަޙައްދުގެ ސްކޫލްތަކުގެ ގްރޭޑް 1 އިން 2،491 ދަރިވަރުންނަށް ޖާގަދީފައިވެއެވެ.

މިއާއެކު މި ދިރާސީ އަހަރު ޖުމުލަ 216 ސްކޫލުގައި ރާއްޖޭގައި ކިޔަވައިދެމުން ދާނެއެވެ. އޭގެތެރޭގައި އެއްދަންފަޅި އަށް ކިޔަވައިދޭ 156 ސްކޫލެއް ހިމެނެއެވެ.

މިއަހަރުގެ ދިރާސީ އަހަރު ފެށީ ދަރިވަރުންނަށް ބޭނުންވާ ހުރިހާ ފޮތަކާއި މުދައްރިސުންވެސް ހަމަކޮށްގެންނެވެ. މިއަހަރު ރާއްޖޭގެ ސްކޫލްތަކުގައި 6،516 ރާއްޖޭގެ މުދައްރިސުންނާއި 1،843 ބިދޭސީ މުދައްރިސުން ކިޔަވައިދޭނެކަމަށް އެޑިއުކޭޝަން މިނިސްޓްރީން ބުނެއެވެ.