ކޮންމެ 5 އަހަރަކުން ވެރިކަން ބަދަލުވުމަކީ ރައްޔިތުންނަށް އެންމެ ފައިދާހުރި ގޮތެއް ނޫންކަމަށް ހެރިޓޭޖް މިނިސްޓަރ ޔުމްނާ މައުމޫން ވިދާޅުވެއްޖެއެވެ.

މިނިސްޓަރ ޔުމްނާ މައުމޫނަކީ ރައީސް އިބްރާހިމް މުހައްމަދު ސާލިހަށް ދެވަނަ ދައުރެއް ދިނުމަށް ތާއީދުކުރައްވާ ބޭފުޅެކެވެ.

ޔުމްނާ ކުރެއްވި ޓްވީޓެއްގައި ވިދާޅުވީ ކޮންމެ 5 އަހަރަކުން ސިޔާސަތުތައް ބަދަލުވެ، ފަށާފައިހުރި މަޝްރޫޢުތަކާއި މަސައްކަތްތައް ހުއްޓުމުން ރައްޔިތުންނަށް ލިބުނު ކުރިއެރުން އަނެއްކާވެސް ދާނީ ފަހަތަށްކަމަށެެވެ. އެހެންކަމުން ކޮންމެ 5 އަހަރަކުން ވެރިކަން ބަދަލުވުމަކީ ރައްޔިތުންނަށް އެންމެ ފައިދާހުރި ގޮތެއް ނޫންކަމަށްވެސް ޔުމްނާ ވިދާޅުވިއެވެ.

ކޮންމެ 5 އަހަރަކުން ވެރިކަން ބަދަލުވުމަކީ ރައްޔިތިންނަށް އެންމެ ފައިދާހުރި ގޮތެއް ނޫން. ކޮންމެ 5 އަހަރަކުން ސިޔާސަތުތައް ބަދަލުވެ، ފަށާފައިހުރި މަޝްރޫޢުތަކާއި މަސައްކަތްތައް ހުއްޓުނީމަ ރައްޔިތުންނަށް ލިބުނު ކުރިއެރުން އަނެއްކާ ވެސް ދާނީ ފަހަތަށް. #UfaaveriAmaanRaajje pic.twitter.com/gXZNbhLf6V

— Yumna Maumoon 🇲🇻 🤝🇵🇸 (@yumna_maumoon) September 11, 2023

ހޮނިހިރުދުވަހު ބޭއްވި ވަގުތީ ނަތީޖާ ދައްކާގޮތުން ރިޔާސީ އިންތިޚާބުން އެންމެ ގިނަ ވޯޓާއެކު ކުރި ހޯއްދަވާފައިވަނީ ޕީއެންސީގެ ކެންޑިޑޭޓް ޑރ. މުޙައްމަދު މުޢިއްޒެވެ. އެއީ ވޯޓުލީ މީހުންގެ 46.06 އިންސައްތަ ވޯޓާއެކުއެވެ. ދެވަނަ ލިބިވަޑައިގެންނެވި އެމްޑީޕީގެ ރިޔާސީ ކެންޑިޑޭޓް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙަށް ލިބިވަޑައިގަތީ 39.05 އިންސައްތަ ވޯޓެވެ.

މިފަހަރުގެ ރިޔާސީ އިންތިޚާބުގައި ފުރަތަމަ ބުރުން އެއްވެސް ކެންޑިޑޭޓަކަށް 50 އިންސައްތައަށްވުރެ އިތުރަށް ވޯޓް ލިބިވަޑައިގެންފައި ނުވާތީ، އިންތިހާބުގެ ނަތީޖާ ނެރޭނީ ދެވަނަ ބުރެއް ބާއްވައިގެންނެވެ.