މިއަދު ކުރިއަށްދާ ރިޔާސީ އިންތިޚާބުގެ ދެވަނަަ ބުރުގައި ޕީޕީއެމް-ޕީއެންސީ ކެންޑިޑޭޓް ޑޜ. މުޙައްމަދު މުޢިއްޒުގެ ރަނިންގ މޭޓް ޙުސެއިން މުޙައްމަދު ލަތީފް (ސެމްބެ) ވޯޓް ލައްވައިފިއެވެ.

ސެމްބެ ވޯޓު ލައްވާފައިވަނީ ފަރެސްމާތޮޑާ ދާއިރާގެ މީހުން ވޯޓްލާ ތާޖުއްދީން ސްކޫލްގައި ބަހައްޓާފައިވާ ވޯޓު ފޮށްޓަށެވެ.

މިއަދު ހެނދުނު 08:00 އިން ފެށިގެން ރާއްޖޭގެ އެކި ކަންކޮޅުތަކުގައި ވަނީ ވޯޓް ލާން ފަށާފައެވެ.

އިލެކްޝަންސް ކޮމިޝަނުން ބުނީ ހަވީރު 5:00 ގެ ނިޔަލަށް ވޯޓް ލާ މަރުކަޒުތަކަށް ވަދެވޭނެ ކަމަށެވެ. އަދި ވޯޓު ފޮށިތައް ބަންދު ކުރާނީ ވޯޓުލުން ބަންދުވާ ގަޑި ޖެހޭއިރު ކިއޫގައި ތިބޭ ބަޔަކަށް ވޯޓުލުމުގެ ފުރުސަތުދިނުމަށް ފަހުގައެވެ.

‏ވޯޓުލާން ފެށުމާއެކު ވީހާވެސް އަވަހަކަށް ވޯޓުލުމުގެ ޙައްގު އަދާކުރެއްވުމަށް އިލެކްޝަންސް ކޮމިޝަނުން ވަމީ އިލްތިމާސް ކޮށްފައެވެ.