މިއަދު ބޭއްވި ރިޔާސީ އިންތިހާބުގައި ކުރިމަތިވެ ވަޑައިގެންނެވީ ނާކާމިޔާބީ ގަބޫލުކުރައްވައި، އިންތިހާބު ކާމިޔާބު ކުރެއްވި، ޑރ. މުހައްމަދު މުއިއްޒުއަށް ރައީސް އިބްރާހިމް މުހައްމަދު ސާލިހު މަރުހަބާ ވިދާޅުވެއްޖެއެވެ.

ރިޔާސީ އިންތިހާބުގެ ނަތީޖާއާ ގުޅިގެން މިރޭ ކުރެއްވި ޓްވީޓެއްގައި ރައީސް ސާލިހު ވިދާޅުވީ ‏ރިޔާސީ އިންތިޚާބު ކާމިޔާބުކުރެއްވި ޑރ. މުޢިއްޒުއަށް މަރުހަބާ ވިދާޅުވާކަމަށެވެ. އަދި އިންތިޚާބުގައި ރައްޔިތުން ދެއްކެވި ޑިމޮކްރެޓިކް ރީތި ނަމޫނާއަށްޓަކާ ޝުކުރު ދަންނަވާކަމަށްވެސް ރައީސް ސާލިހު ވިދާޅުވިއެވެ.

ރައީސް ސާލިހުގެ ޓްވީޓްގައި ވަނީ އެކުގައި މަސައްކަތްކުރި އެމް.ޑީ.ޕީ އާއި އަދާލަތު ޕާޓީގެ މެމްބަރުންނަށްއި އެމަނިކުފާނަށް ވޯޓުދެއްވި ހުރިހާ ރައްޔިތުންނަށް ޝުކުރު ދަންނަވާފައެވެ.

ރިޔާސީއިންތިޚާބު ކާމިޔާބުކުރެއްވި @MMuizzu އަށް މަރްޙަބާ ދަންނަވަން. އިންތިޚާބުގަ ރައްޔިތުން ދެއްކެވި ޑިމޮކްރެޓިކް ރީތި ނަމޫނާއަށްޓަކާ ޝުކުރު ދަންނަވަން. އެކުގަ މަސައްކަތްކުރި އެމް.ޑީ.ޕީ އާއި އޭ.ޕީ ގެ މެމްބަރުން އަދި އަޅުގަޑަށް ވޯޓުދެއްވި ހުރިހާރައްޔިތުންނަށް ޝުކުރު ދަންނަވަން

— Ibrahim Mohamed Solih (@ibusolih) September 30, 2023

މިއަދު ބޭއްވި އިންތިހާބުގެ ނަތީޖާ ދައްކާގޮތުން ޑރ. މުޢިއްޒު އިންތިހާބު ކާމިޔާބުކުރެއްވީ 53.8 އިންސައްތަ ވޯޓުންނެވެ. ރައީސް ސާލިހަށް ލިބިވަޑައިގަތީ 46.2 އިންސައްތަ ވޯޓެވެ.