ފަލަސްތީނުގެ ޙައްޤުގައި ދިވެހި އަންހެނުން މިއަދު މާލޭގައި ހިނގާލުމެއް ބާއްވައިފިއެވެ.

މިއަދު ހަވީރު މާލޭގައި ބޭއްވި މި ހިނގާލުމުގައި ބައިވެރިވީ ހަމައެކަނި އެކި އުމުރު ފުރާގެ އަންހެންކުދިންނާއި އަންހެނުންނެވެ. މި ހިނގާލުން ރާވާފައިވަނީ އިސްރާ އެސޯސިއޭޝަނާއި އެހެން ޖަމިއްޔާތަކާއި ގުޅިގެންނެވެ. ހިނގާލުން ކުރިއަށްގެންދިޔައީ ރަސްފަންނު ސަރަހައްދުން ފެށިގެން އާޓިފިޝަލް ބީޗާއި ހަމައަށެވެ.

އިޒްރޭލުން ފަލަސްތީން ރައްޔިތުންނާއި ދެކޮޅަށް ހިންގަމުންދާ ޖަރީމާތައް ހުއްޓުވުމަށް ގޮވާލާ މި ހަރަކާތުގައި ވަރަށް ގިނަ އަދަދެއްގެ އަންހެނުން ބައިވެރިވިއެވެ. އަދި މި ހިނގާލުމުގައި އެމީހުން ވަނީ ފަލަސްތީން މީހުންނަށް އިޒްރޭލުން ދެމުންގެންދާ އަނިޔާތައް ރަމްޒުކޮށްދިނުމަށް އިޒްރޭލުގެ ހަމަލާތަކުގައި ޝަހީދުވެގެން ކަފުންކޮށްފައިވާ ކުޑަކުދިން ރަމްޒުކޮށްދޭ ތަކެތި ވެސް ބޭނުންކިށްފައެވެ. އަދި ހިނގާލުމުގެ ބައިވެރިން ވަނީ އިޒްރޭލާއި ދެކޮޅަށް އަޑު އުފުލައި ޝުޢޫރުތައް ލިޔެފައިވާ ޕޯސްޓަރުތަކާއި ފަލަސްތީނުގެ ދިދަވެސް ބޭނުންކޮށްފައެވެ.

Falastheen minivan kurey pic.twitter.com/HqDFBza4NO

— އެނގިލައްވާތޯ (@Engilahvaatho) November 3, 2023

މި ހަރަކާތް ނިންމާލުމުގެ ގޮތުން ފަލަސްތީނުގެ ރައްޔިތުންނަށް އަނިޔާވެރިންގެ ކިބައިން ނަސްރު ދެއްވުމަށް އެދި ދުޢާއެއް ކޮށްފައި ވެއެވެ.

7 އޮކްޓޫބަރުން ފެށިގެން އިޒްރޭލުން ހުއްޓުމެއްނެތި ދެމުންގެންދާ އަނިޔާތަކުގައި ޝަހީދުވި ފަލަސްތީނުގެ ކުޑަކުދިންގެ އަދަދު 3600 އިން މައްޗަށް ވަނީ އަރާފައެވެ.