އެމްއެމްޕީއާރުސީގެ ހިޔާނާތުގެ މޭސްރިންކަމަށްވާ ކުރީގެ ނައިބު ރައީސް އަހުމަދު އަދީބާއި އެމްއެމްޕީއާރްސީގެ ކުރީގެ މެނޭޖިންގ ޑިރެކްޓަރ އަބްދު ﷲ ޒިޔަތަށް ރައީސުލްޖުމްހުރިއްޔާ އިބްރާހީމް މުހައްމަދު ޞާލިހު މައާފް ދެއްވުމަކީ ބަލައިގަނެވޭނެ ކަމެއް ނޫންކަމަށް އަދާލަތު ޕާޓީން ބުނެފިއެވެ.

މީގެކުރިން ރައީސް ސާލިހުގެ ހުރިހާ ނިންމެވުމަކަށް ތާއީދުކުރި އަދާލަތު ޕާޓީން މިފަހަރު ރައީސް ސާލިހުގެ ނިންމުން ބަލައިނުގަންނާނެކަމަށް ބުނެފައި މިވަނީ ވެރިކަން ނިމެން 3 ދުވަހަށް ވެފައިވަނިކޮށެވެ.

އަދާލަތުން ނެރުނު ބަޔާނެއްގައި ބުނީ ދައުލަތުގެ މުދަލަށް ހިޔާނާތްތެރިވި ބަޔަކަށް ހައްގު އަދަބު ނުލިބި ދިޔުމަކީ ބަލައިގަނެވޭ ކަމެއް ނޫންކަމަށެވެ.

ދައުލަތުގެ މުދަލަށް ބޮޑެތި ޚިޔާނާތް ވީކަމަށް އަމިއްލައަށް އިޢުތިރާފްވެ އެކަމުގެ ކުށް ސާބިތުވެފައިވާ ފަރާތްތަކަށް ޙައްޤު އަދަބު ނުލިބި ދިޔުމަކީ މި ޕާޓީއިން ބަލައިގަންނަ ކަމެއް ނޫން.

— Adhaalath Party (@AdhaalathOffice) November 14, 2023

އެމްއެމްޕީއާރުސީގެ ބޮޑު ހިޔާނާތް ހިންގުމުގައި އިސްކޮށް އުޅުއްވި ކުރީގެ ނައިބު ރައީސް އަހްމަދު އަދީބާއި އެމްއެމްޕީއާރުސީގެ ކުރީގެ މެނޭޖިން ޑިރެކްޓަރު އަބްދުﷲ ޒިޔަތަށް، ރައީސް އިބްރާހިމް މުހައްމަދު ސާލިހް މައާފް ދެއްވުމަށް ނިންމެވީ އިއްޔެއެވެ.

ފާހަގަކޮށްލެވޭ ގޮތުގައި މައާފް ދެއްވުމާއި ހަމައަށްވެސް އެ ދެބޭފުޅުން ތިއްބެވީ ގޭގައެވެ.

ހިޔާނާތުގެ މައްސަލައިގައި އަދީބަށް 20 އަހަރުގެ ޖަލު ހުކުމެއް އަދި ޒިޔަތަށް 32 އަހަރުގެ ހުކުމެއް އިއްވިއެވެ.