ޚާރިޖީ ވުޒާރާގައި 5 އަހަރު ވަންދެން ބޭނުންކުރައްވަމުން ގެންދެވި އޮފީސް މޭޒުކޮޅުމަތީގައި އަލަށް މަގާމާއި ހަވާލުވެ ވަޑައިގެންނެވި ފޮރިން މިނިސްޓަރ މޫސާ ޒަމީރަށް އެޑްރެސް ކުރަށްވައި ލިޔުއްވި ސިޓީއެއް ބާއްވަވާފައިވާނެ ކަމަށް ކުރީގެ ފޮރިން މިނިސްޓަރ ޢަބްދުﷲ ޝާހިދު ވިދާޅުވެއްޖެއެވެ.

އިއްޔެ ފޮރިން މިނިސްޓަރކަމުގެ ހުވާކުރެއްވި ޒަމީރަށް ރައްދުކުރެއްވި އެ ސިޓީގައި ޝާހިދު ވަނީ ޒަމީރަށް މަރުހަބާ ވިދާޅުވެފައެވެ. އަދި ޒަމީރަކީ ފޮރިން މިނިސްޓްރީ ހިންގުމަށް ގާބިލް، ތަޖުރިބާ ލިބިވަޑައިގެންފައިވާ ބޭފުޅެއްކަމަށް ވިދާޅުވެފައި ވެއެވެ.

Before I left my office, I left a letter of congratulations to my successor, H.E. @MoosaZameer wishing him well and success in his role as Foreign Minister.

My sincere best wishes to Minister Zameer. pic.twitter.com/cH3zQoakfA

— Abdulla Shahid (@abdulla_shahid) November 18, 2023

މި ސިޓީގައި ޝާހިދު ވަނީ ފޮރިން މިނިސްޓްރީއަކީ 90 އަހަރުގެ ދިގު މާޒީއެއް އޮތް ތަނެއް ކަމާއި މިހާރު އެ މިނިސްޓްރީ ހިންގަނީ ވަކި ގާނޫނެެއްގެ ދަށުން ކަމަށް ވިދާޅުވެފައެވެ.

ސޯޝަލް މީޑިއާގައި ވެސް އާއްމުކުރައްވާފައިވާ އެ ސިޓީގައި ޝާހިދު ވަނީ ފޮރިން މިނިސްޓްރީގައި މިވަގުތު ތިބި މުވައްޒަފުންނަށް ތަޢުރީފުކުރައްވާފައެވެ. އަދި އެ މުވައްޒަފުންނަކީ ވޭތުވެދިޔަ ފަސް އަހަރު ޕްރޮފެޝަނަލްކަމާއި ގާބިލުކަމާއެކު އިހްލާސްތެރި މަސައްކަތްތަކެއް ކުރެއްވި މުވައްޒަފުންތަކެއް ކަމަށް ޝާހިދު ފާހަގަކުރެއްވިއެވެ. ހަމައެހެންމެ، ހާރިޖީ ދާއިރާއިން ހާސިލުކުރެވިފައިވާ ކާމިޔާބީއާއި ކުރިއެރުން ލިބިފައިވަނީ އެމުވައްޒަފުންގެ ސަބަބުންކަމަށް ވެސް ޝާހިދުގެ ސިޓީގައި ފާހަގަކުރައްވާފައި ވެއެވެ.

"އަޅުގަނޑު ޔަގީންކުރާ ގޮތުގައި މަނިކުފާނުގެ ލީޑަޝިޕާއި އިރުޝާދުގެ ދަށުން ޓީމް ޚާރިޖީ، ދިވެހިރާއްޖެ ބައިނަލްއަގުވާމީ އާ އުސްމިންތަކަށް ގެންގޮސްދޭނެ." ސިޓީގައި ލިއުއްވާފައި ވެއެވެ.

މިސިޓީއާއި ގުޅޭގޮތުން އާ ޚާރިޖީ ވަޒީރު އަދި ވަކި އެއްޗެއް ވިދާޅެއް ނުވެއެވެ.