ސަރުކާރުގެ އެހީގައި ކުރާ ހައްޖު ރަނގަޅުވާނެ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެ އެވެ.

އިސްލާމިކް މިނިސްޓަރު ޑރ. މުޙައްމަދު ޝަހީމް ވިދާޅުވީ ސަރުކާރަކީ ރައްޔިތުންގެ ބެލެނިވެރި ފަރާތް ކަމަށާއި ސަރުކާރުގައި ހުންނާނީ ރައްޔިތުންގެ ފައިސާ ކަމަށެވެ. ފަގީރަކަށް ވިޔަސް އަދި ފަގީރަކަށް ނުވިޔަސް ސަރުކާރުން ނުވަތަ އެހެން މީހެއްގެ އެހީގައި ކުރާ ހައްޖަކީ 100 ޕަސެންޓް ރަނގަޅު ހައްޖެއް ކަމަށް ޑރ. ޝަހީމް ވިދާޅުވި އެވެ. މިނިސްޓަރު ވިދާޅުވީ އެއީ ސިޔާސީ ވާހަކައެއް ނޫން ކަމަށާއި އެއީ ދީނީ ވާހަކައެއް ކަމަށެވެ.

ޝަހީމް އިތުރަށް ވިދާޅުވީ ސަރުކާރުގެ ޚަރަދުގައި މީހުން މީގެ ކުރިން ވެސް ހައްޖަށް ފޮނުވަމުން އައި ކަމަށެވެ. އެގޮތުން ކުރީގެ ރައީސް މައުމޫން އަބްދުލްޤައްޔޫމްގެ ވެރިކަމުގައި ސަރުކާރުން އަހަރަކު 40 މީހުން ހައްޖަށް ފޮނުވި ކަމަށާއި އަދި ސައުދީ ސަރުކާރުގެ ޚަރަދުގައި ވެސް މީހުން ހައްޖަށްދާކަމަށް ޝަހީމް ވިދާޅުވިއެވެ. އަދި ސައުދީ ސަރުކާރުގެ ހަރަދުގައި ފަލަސްތީނުން ވެސް 1،000 މީހުން މިއަހަރު ހައްޖަށްދާކަން ވެސް ޝަހީމް ވަނީ ފާހަގަކުރައްވާފަ އެވެ.

ސަރުކާރުގެ ޚަރަދުގައި ކުރާ ހައްޖު ސައްހަވާނެ ކަމަށް ސައުދީ އަރަބިއްޔާގެ ދަންނަބޭކަލުންގެ މަޖިލީހުން ފަތުވާދީފައި އޮންނާނެ ކަމަށާއި އަދި އިސްލާމީ ދުނިޔޭގެ އެންމެ ބޮޑެތި އިލްމުވެރިންގެ ފަތުވާ ވެސް އެކަމުގައި އޮންނާނެ ކަމަށްވެސް ޝަހީމް ވިދާޅުވި އެވެ. ނިކަމެތިން ހައްޖަށް ފޮނުވަން ނިންމެވުމުކީ ރައީސް ޑރ. މުހައްމަދު މުއިއްޒު ނިންމެވި ރަނގަޅު ނިންމެވުމެއް ކަމަށް ޝަހީމް ވިދާޅުވި އެވެ.

މިއަހަރުން ސަރުކާރުގެ ޚަރަދުގައި ވަނީ 50 މީހަކު ހައްޖަށް ފޮނުވާފައެެވެ. މިފަސްއަހަރުގެ ތެރޭގައި ސަރުކާރުގެ ޚަރަދުގައި ފަގީރުންގެ ތެރޭގައި ހިމެނޭ 1000 މީހުން ހައްޖަށް ފޮނުވުމަކީ ސަރުކާރުގެ ވައުދެކެެވެ.