ގައުމީ ދިފާއީ ބާރު، އެމް.އެން.ޑީ.އެފުން ފަލަސްތީނާއެކު ދިވެހިން ޓެލެތޯނަށް 2.1 މިލިއަން ރުފިޔާ ހަދިޔާ ކޮށްފިއެވެ.

ގައުމީ ދިފާއީ ބާރުގެ ފަރާތުން ހަދިޔާކުރެއްވި 2،169،826.32 ރުފިޔާގެ ފައިސާގެ އެހީ ހަވާލުކޮށްދެއްވީ ޗީފް އޮފް ޑިފެންސް ފޯސް ލެފްޓިނެންޓް ޖެނެރަލް އިބްރާހީމް ޙިލްމީ އަދި ވައިސް ޗީފް އޮފް ޑިފެންސް ފޯސް ބްރިގޭޑިއަރ ޖެނަރަލް އަހުމަދު ގިޔާސްއެވެ. ދިފާއީ ވަޒީރު މުޙައްމަދު ޣައްސާން މައުމޫން ވެސް މި ރަސްމިއްޔާތުގައި ބައިވެރިވެވަޑައިގަތެވެ.

މިއީ މިހާތަނަށް އެއްފަރާތަކުން މި ޓެލެތޯނަށް ހަދިޔާކުރި އެންމެ ބޮޑު އަދަދެވެ.

"ފަލަސްޠީނާއެކު ދިވެހީން" ޓެލެތޯނުގައި ދިވެހިރާއްޖޭގެ ޤައުމީ ދިފާޢީ ބާރުން 2,169,826.32ރ (ދެމިލިއަން އެއްލައްކަ ފަސްދޮޅަސް ނުވަހާސް އަށްސަތޭކަ ސައްބީސް ރުފިޔާ ތިރީސް ދެލާރި) ގެ ފައިސާގެ އެހީ ހަދިޔާކޮށްފި.https://t.co/02VH2dvI8p pic.twitter.com/EgN3ZR5f0P

— Maldives National Defence Force (@MNDF_Official) June 12, 2024

ފަލަސްތީނަށް އެހީވުމަށް ކުރިޔަށް ގެންދާ ޓެލެތޯންގައި ފައިސާ ހަދިޔާ ކުރުމަށް މާލެ ސަރަޙައްދުގައި 13 ފަންޑު ފޮށި ވަނީ ބަހައްޓާފައެވެ. އަދި އަތޮޅުތަކުގައި ކައުންސިލްތަކާއި ޖަމިއްޔާތަކުން ފައިސާ ހޯދުމަށް ހަރަކާތްތަކެއް ކުރިޔަށް ގެންދާ ގޮތަށް ވަނީ ހަމަޖެހިފައެވެ.

މި ޓެލެތޯނުން ލިބޭ ފައިސާ ހަދިޔާ ކުރުމަށް ހަމަޖެހިފައިވަނީ ޔުނައިނެޑް ނޭޝަންސް ރިލީފް އެންޑް ވޯކްސް އެޖެންސީ ފޯ ފަލަސްތީން ރެފިއުޖީސް (ޔޫ.އެން.އާރް.ޑަބްލިއު.އޭ) އަށެވެ.



މިއަދު ހެނދުނު 8 ޖެހިއިރު ޕީއެސްއެމުން ފަށާފައިވާ މި ޓެލެތޯން މިރޭ ދަންވަރު 12 އާ ހަމައަށް ކުރިއަށްދާނެއެވެ.