އެމްޑީޕީގެ ގައުމީ މަޖިލީހުން ހުސްވެފައިވާ އެކި މަގާމުތަކަށް ވާދަކުރާނެ އިތުރުބަޔަކު ކުރިމަތިލާފައި ނުވާތީ އިންތިހާބަކާއި ނުލާ 34 ފަރާތަކަށް މަގާމު ކަށަވަރުވެއްޖެއެވެ.

އަންނަ އޮގަސްޓް މަހުގެ ދެވަނަ ދުވަހު އެމްޑީޕީގެ އެތެރޭގެ އިންތިހާބު ބޭއްވުމަށް ހަމަޖެހިފައިވާއިރު އެ ޕާޓީގެ ދާއިރާތަކުގެ އެކި މަގާމުތަކަށް ވާދަކުރުމަށް ހުޅުވާލި ފުރުސަތުގައި އިންތިހާބަކާއި ނުލާ މަގާމު ލިބުނު 34 ނައިބު ރައީސުންގެ ނަންތައް އެ ޕާޓީން މިއަދު ވަނީ އާންމުކޮށްފައެވެ.

އެ ލިސްޓްގައި ހިމެނެނީ 23 ރަށެއްގެ ނައިބު ރައީސުންނާއި ހަތް ދާއިރާއެއްގެ ނައިބު ރައީސުން އަދި ހަތަރު ސިޓީއެއްގެ ނައިބު ރައީސުންނެވެ.

އެމްޑީޕީގެ ދާއިރާތަކުގެ އެކި މަގާމުތަކަކީ މީގެ ކުރިން ބޮޑު ވާދަވެރިކަމެއް އޮންނަ މަގާމުތަކެކެވެ. ނަމަވެސް އެމްޑީޕީގެ ހިންގުމަށްއައި ހީނަރުކަމާއެކު މިހާރު އެ ޕާޓީގެ މަގާމުތަކަށް މީހުންގެ ޝައުގުވެރިކަން ދަށްވަމުން އަންނަނީ ކަމަށް ގިނަބަޔަކު ބުނެއެވެ.

ނަތީޖާއެއްގެގޮތުން ޖެހިޖެހިގެން އިންތިހާބުތަކުން ބަަލިވާތީ އެކަން ބެލުމަށް މިހާރު ދަނީ ރޯޑު މެޕެއް އެކުލަވާލައިގެން މަސައްކަތްތަކެއް ކުރަމުންކަމަށް އެޕާޓީއިން ބުނެއެވެ.