ހުޅުމާލޭ 2 ވަނަ ފިޔަވަހީގެ ވިނަރެސް ފްލެޓްތަކުގެ ފަހަތުގައި ހުންނަ ސައިޓެއްގައި ނުތާހިރުކޮށް އުޅުނު ބިދޭސީންގެ މައްސަލަ ކަމާބޭހޭ ފަރާތްތަކަށް އަންގާފައިވާ ކަމަށް އިމިގްރޭޝަނުން ބުނެފިއެވެ.

ވިނަރެސް ފްލެޓް ފަހަތުގައި ހަދާފައިވާ އެކޮމެޑޭޝަން ބްލޮކްގައި ގަވާއިދާ ހިލާފަށް ބިދޭސީން އުޅެމުންދާ ކަމަށް ސޯޝަލް މީޑިއާގައި އާއްމުވެފައިވާ މައްސަލައާ ގުޅިގެން އިމިގްރޭޝަނުން އާއްމުކުރި ނޫސްބަޔާނުގައި ބުނީ، އިމިގްރޭޝަންގެ ޓާސްކު ފޯހަކުން ހޯމަދުވަހު ހަވީރު އެތަން ބަލާ ފާސްކޮށްފައިވާ ކަމަށެވެ.

އެތަނުގައި ގަވާއިދާ ހިލާފަށް ބިދޭސީން އުޅެމުންދާ ކަމަށް ލިބުނު މައުލޫމާތާއެކު، އެތަން ބަލާ ފާސް ކުރުމުގެ ތެރޭގައި، އެތަނުގައި ތިބި ބިދޭސީންގެ ތެރެއިން ސައްހަ ވިސާއެއް ނެތް ދެ ބިދޭސީއަކު އިމިގްރޭޝަންގެ ބެލުމުގެ ދަށަށް ގެންގޮސްފައިވާ ކަމަށް އިމިގްރޭޝަނުން ބުންޏެވެ.

އޭގެ އިތުރުން އިމިގްރޭޝަނުން ބުނީ، އެތަނަކީ ސާފުތާހިރު ކަމަށް އެއްވެސް ސަމާލުކަމެއް ނުދީ، އިޖުތިމާއީ މިންގަނޑާއި މުޅިން ހިލާފަށް، ބިދޭސީން އެމީހުންގެ ދިރިއުޅުމުގެ ކަންކަމާއި ކެއުމުގެ އިންތިޒާމު ހަމަޖައްސާފައިވާ ތަނެއް ކަމަށެވެ. އެހެންކަމުން އެކަން ކަމާބެހޭ ފަރާތްތަކުގެ ސަމާލުކަމަށް ގެނެސްފައިވާ ކަމަށް އިމިގްރޭޝަނުން ބުނެފައި ވެއެވެ.