އިންޑިއާ އައުޓް ކެމްޕޭނުގައި ހެދި ދޮގުތަކަށް މި ސަރުކާރުން މައާފަށް އެދުމަށް އިދިކޮޅު އެމްޑީޕީން ގޮވާލައިފިއެވެ.

އިންޑިއާގެ އެކްސްޓާނަލް އެފެއާޒް މިނިސްޓަރު ޑރ. ސުބްރަމަނިއަމް ޖައިޝަންކަރު މިހާރު ރާއްޖެއަށް ކުރައްވަމުން ގެންދަވާ ދަތުރުފުޅުގައި މިރޭ ވަނީ އެމްޑީޕީގެ ލީޑަޝިޕާއި ބައްދަލުކުރައްވާފައެވެ.

އެ ބައްދަލުވުމަށްފަހު އެމްޑީޕީން ނެރުނު ބަޔާނެއްގައި ބުނެފައިވަނީ ރާއްޖެއާއި އިންޑިއާގެ ގުޅުން އަބަދުވެސް ބިނާވެފައިވަނީ އެއް ޤައުމުން އަނެއް ޤައުމަށް އިޙްތިރާމްކުރުމާއި، ބައިނަލްއަޤްވާމީ ޤާނޫނުތަކަށް ޙުރުމަތްތެރިކޮށް ހިތުމާއި، ދެޤައުމުގެ ސަރަޙައްދުގެ ސަލާމަތްތެރިކަމާއި، އަދި ސަރަޙައްދީ ސަލާމަތާއި، އިންޑިއާ ކަނޑުގެ ސަރަޙައްދުގެ އަމާންކަމާއި ރައްކާތެރިކަމަށް ކުރެވޭ މަސައްކަތްތަކުގެ މައްޗަށް ކަމަށެވެ.

އަދި ރާއްޖެއިން "ބައިނަލްއަޤްވާމީ 911 އަށް ގުޅައިފި" ކޮންމެ ވަގުތެއްގައިވެސް އެންމެ ފުރަތަމަ އިޖާބަދޭނީ އިންޑިއާކަމުގެ ޔަޤީންކަން ރާއްޖެ އަށް އަބަދުވެސް އޮންނަ ކަމަށް އެމްޑީޕީން ނެރުނު ބަޔާނުގައިވެއެވެ.

އެމްޑީޕީން ބުނީ މިއަދުގެ ސަރުކާރުން އެކި ގޮތްގޮތަށް އިންޑިއާއާ ދެކޮޅަށް ދިވެހި ރައްޔިތުންގެ މެދުގައި ނަފްރަތު އުފެއްދުމަށް މަސައްކަތްކުރިކަމީ ހިތާމަހުރި ކަމެއްކަމަށާއި އެކި ބަސްތަކާއި މަލާމާތުގެ ޒަރީއާއިން، ގިނަ ދުވަސްވީ ރަޙްމަތްތެރިއެއް އަދި ތަރައްޤީގެ ބައިވެރިއެއް ކަމަށްވާ އިންޑިއާ، ގަނާކުރާ ޤައުމެއްގެ ގޮތުގައި ސިފަކުރުމުގެ ސަބަބުން އެކަމުގެ ނޭދެވޭ އަސަރުތައް ރާއްޖޭގެ އިޤްތިޞާދަށްކޮށް، ބައިނަލްއަޤްވާމީ މުޖްތަމަޢުގައި ރާއްޖެއަށް ލިބިފައި އޮތް މަޤާމަށް އަސަރުކޮށްފައިވާ ކަމަށެވެ.

އެމްޑީޕީން ނެރުނު ބަޔާނުގައި ރައީސް މުޢިއްޒުގެ ސަރުކާރުން އިންޑިއާއާމެދު ގެންގުޅޭ ސިޔާސަތު "އިންޑިއާ އައުޓް" އިން "ވެލްކަމް އިންޑިއާ" އަށް ބަދަލުކުރި ކުރުމަށް މަރުހަބާ ކިޔެވެ. އަދި މި ބަދަލަކީ ހަމައެކަނި ވަގުތީ ނުވަތަ ދެއްކުންތެރިކަމުގެ ބަދަލަކަށް ނުހަދައި، ދިވެހި ރައްޔިތުންގެ މަޞްލަޙަތަށްޓަކައި ދެމެހެއްޓެނިވި އަދި މާނަހުރި ބަދަލަކަށް ވާނެކަމަށް އުއްމީދުކުރާ ކަމަށް އެމްޑީޕީގެ ވަނީ ބުނެފައެވެ.

މީގެ އިތުރުން، "އިންޑިއާ އައުޓް" ކެމްޕޭނުގައި ހެދި ދޮގުތަކާއި އޭގެ ސަބަބުން ލިބުނު ގެއްލުންތަކަށް، ރައްޔިތުންގެ ކިބައިން މަޢާފަށް އެދުމަށް މި ސަރުކާރަށް އެމްޑީޕީން ވަނީ ގޮވާލާފައިވެއެވެ.