ސޯޝަލް އެންޑް ފެމިލީ ޑިވެލޮޕްމަންޓް މިނިސްޓްރީން ކުރިއަށް ގެންދާ "ހާލު ކިހިނެއް؟" ޕްރޮގްރާމުން ފާހަގަވި އާއިލާތަކަކަށް އެހީތެރިކަން ފޯރުކޮށްދިނުމުގެ މަސައްކަތް ފަށައިފި އެވެ.

މިދިޔަ މޭ މަހުގެ 30 ވަނަ ދުވަހުން ފެށިގެން ކުރިއަށް ގެންދާ އެ ޕްރޮގްރާމަކީ އޯގާތެރި މުޖުތަމައެއް ބިނާކުރުމަށް ރައީސް ޑރ. މުހައްމަދު މުއިއްޒު ގެންގުޅުއްވާ ތަސައްވުރާއި އެއްގޮތަށް ރާއްޖޭގައި މީހުން ދިރިއުޅޭ ހުރިހާ ރަށެއްގައި ތިބި ރައްޔިތުންގެ ގާތަށް ޒިޔާރަތްކޮށް، އެމީހުންގެ ހާލު ބަލައި، މުޖުތަމައުގައި ތިބި އެހީތެރިކަން ބޭނުންވާ ފަރާތްތައް ދެނެގަނެ، ރައްޔިތުންނާއި ގާތުން ހިދުމަތް ފޯރުކޮށްދިނުމަށް އެހީތެރިވެ ބާރުއެޅުމުގެ މަގުސަދުގައި ކުރިއަށް ގެންދާ ޕްރޮގްރާމެކެވެ.

ސޯޝަލް މިނިސްޓްރީން އެކްސްގައި ކުރި ޕޯސްޓެއްގައި ބުނީ މިހާތަނަށް ހާލުގައި އުޅޭ ހަ އާއިލާއެއް ފާހަގަވެފައިވާ ކަމަށެވެ.

އަދި އެ އެއާއިލާތަކަށް އެހީތެރިވުމަށް ރާއްޖޭގައި އެހީދޭ ޖަމިއްޔާއެއް ކަމަށްވާ މަމްސް އެއިޑް އާއި އެޗްޑީސީ ގުޅިގެން އެހީ ތެރިކަން ފޯރުކޮށްދީ އާއިލާތަކުގެ ހާލަތު ރަނގަޅު ކުރުމަށް މަސައްކަތް ފަށާފައިވާ ކަމަށް އެ މިނިސްޓްރީން ބުނެއެވެ.

ޒަރޫރީ ބޭނުންތައް ފުއްދުމަށް ދަތި ޢާއިލާތަކަށް އެހީތެރިކަން ފޯރުކޮށްދިނުމުގައި މަސައްކަތް ކުރަމުންދާ މަމްސް އެއިޑް ޖަމުއިއްޔާއާއި އިޖުތިމާޢީ އަދި ޢާއިލީ ތަރައްޤީއާ ބެހޭ ވަޒީރު ޑރ. ޢާއިޝަތު ޝިހާމް ބައްދަލުކުރައްވައިފިއެވެ.

މަމްސް އެއިޑް އިން ގެންދަނީ މި ވުޒާރާއިން ކުރިއަށް… pic.twitter.com/SKP1BLeFOo

— Ministry of Social and Family Development (@MSFDmv) August 14, 2024

ސޯޝަލް އެންޑް ފެމިލީ ޑިވެލޮޕްމަންޓް މިނިސްޓްރީން އިތުރަށް ބުނީ އެ މިނިސްޓްރީން މަމްސް އެއިޑްގެ މުއައްސިސުންނާއެކު ބައްދަލުކޮށް، އެ ޖަމުއިއްޔާއާއި ގުޅިގެން އާންމު ރައްޔިތުންނަށް އެހީތެރިކަން ފޯރުކޮށްދެވޭނެ ގޮތްތަކާއި، މަސައްކަތްކުރާނެ ދާއިރާތަކާމެދު މަޝްވަރާ ކޮށްފައިވާ ކަމަށެވެ.