އެމެރިކާގެ ޓެކްސަސްގައި ފުރާނައަށް ނުރައްކާވާފަދަ އަނިޔާތަކެއް ލިބިފައިވާ 12 އަހަރުގެ އަންހެން ކުއްޖަކަށް ސްމޫތީއާއި ވިޓަމިން ދިނުމުގެ ސަބަބުން އެކުއްޖާ މަރުވެއްޖެ އެވެ.

ނިއުސް 18 އިން ބުނާގޮތުގައި ޓެކްސަސްގެ 12 އަހަރުގެ އަންހެން ކުއްޖަކަށް ފުރާނައަށް ނުރައްކާ ވާފަދަ އަނިޔާތަކެއް ލިބުމުން އެކަމަށް ފަރުވާ ދިނުމުގެ ގޮތުން އޭނާގެ މައިންބަފައިން ދިން ސްމޫތީއާއި ވިޓަމިންގެ ސަބަބުން އެކުއްޖާ ވަނީ މަރުވެފައެވެ.

މިދިޔަ ހޯމަ ދުވަހު މިރަންޑާ ސިޕްސްއަށް ފުރާނައަށް ނުރައްކާ ވާފަދަ އަނިޔާތަކެއް ލިބިފައިވާއިރު، އެކަމަށް އެކަށީގެންވާ ސިއްހީ ފަރުވާއެއް އޭނާގެ ބެލެނިވެރިން ހޯދައިދީފައެއް ނުވެއެވެ. އެގޮތުން މި ހާދިޘާ ހިނގިތާ 4 ދުވަސް ވީއިރުވެސް ކުއްޖާއަށް ސިއްހީ ގޮތުން އެއްވެސް ފަރުވާއެއް ހޯދަދީފައި ނުވާއިރު، އެކުއްޖާގެ މަންމަ ޑެނީސް ބަލްބަނޭޑާއާއި ދޮން ބައްޕަ ޖެރަލްޑު ގޮންޒާލޭޒް އިމަޖެންސީ ސާވިސަސް އަށް ގުޅާފައިވަނީވެސް ކުއްޖާގެ ހާލު ސީރިއަސްވެ، ނޭވާލާން އުނދަގޫވާން ފެށުމުންނެވެ.

ކުއްޖާގެ ހާލު ސީރިއަސް ވާން ފެށުމުން އިމަޖެންސީ ސާވިސަސްްއަށް ގުޅި ކަމުގައި ވީނަމަވެސް، ބަޔަކު އައުމުގެ ކުރީން ކުއްޖާގެ މަންމަ ވަނީ ގެއިން ނިކުމެ ކުއްޖާ ގޮވައިގެން ކާރެއްގައި ގޮސްފައެވެ. ކުއްޖާގެ މަންމަ މިހެން އަމަލު ކޮށްފައިވަނީ ފުލުހުންނަށް އެމީހުންގެ ގެއަށް ވަނުމުގެ ފުރުސަތު ނުދިނުމަށް ކަމަށްވެސް ރިޕޯޓުގައި ބުނެފައިވެއެވެ.

އެކުއްޖާ މަރުވެފައިވަނީ ފުރާނައަށް ލިބުނު ނުރައްކާތަކަށް ފަރުވާ ދެވިފައި ނުވުމުން ކަމަށް ރިޕޯޓްތައް ބުނާއިރު، މި މައްސަލަ އާއި ގުޅިގެން ކުއްޖާގެ މަންމަ އާއި ދޮންބައްޕަ މިހާރު ވަނީ ފުލުހުންގެ ބެލުމުގެ ދަށަށް ގެންގޮސްފައެވެ.