ރައީސް ޑރ. މުޙައްމަދު މުޢިއްޒު ހުންނެވީ އިންޑިއާއަށް "ކޮމްޕްރޮމައިޒް" ވެފައިކަމަށް ކުރީގެ ރައީސް ޢަބްދުﷲ ޔާމީން ވިދާޅުވެއްޖެއެވެ.

ޕީއެންއެފުން ސިލްސިލާކޮށް ބާއްވަމުންދާ ޖަލްސާތަކުގެ ތެރެއިން މިރޭ ކުރިއަށް ގެންދިޔަ ޖަލްސާގައި ވާހަކަފުޅު ދައްކަވަމުން ރައީސް ޔާމީން ވަނީ ރައީސް ޑރ. މުޙައްމަދު މުޢިއްޒަށް ވަރަށް ބޮޑަށް ފާޑުވިދާޅުވެފައެވެ.

އެގޮތުން އިންޑިއާ ސަރުކާރާ މި ސަރުކާރުން ގުޅުން ބަދަހިކުރާތީ އެކަމަކީ ރައީސް ޑރ. މުޢިއްޒު އިންޑިއާއަށް ކޮމްޕްރޮމައިޒް ވެފައި ހުންނަވައިގެން ކުރައްވާ ކަމެއްކަމަށް ވަނީ ވިދާޅުވެފައެވެ. އަދި އެގޮތަށް ކޮމްޕްރޮމައިޒް ވާންޖެހުނީ ރައީސްގެ ކޮން ކަންތައްތަކެއް އިންޑިއާއަށް އެނގޭތީތޯ ޔާމީން ވަނީ ސުވާލު އުފައްދަވާފައެވެ.

"މުޢިއްޒުގެ ކޮން ކަންތައްތަކެއް އިންޑިއާ ސަރުކާރަށް އެނގޭތީހޭ މުޢިއްޒު ކޮމްޕްރޮމައިޒް ވެގެން މިއުޅެނީ. ޝައްކެއްނެތް މިންވަރަށް އެބަ އެނގޭ މުޢިއްޒު ކޮމްޕްރޮމައިޒް ވެފައި ހުރިކަން" ޔާމީން ވިދާޅުވިއެވެ.

ޔާމީންގެ ވާހަކަފުޅުގައި ވަނީ އިންޑިއާ އައުޓް ކެމްޕޭން ކުރިއަށް ގެންދަން ކުރިން އިސްކޮށް އުޅުނު ފަރާތްތަކުން މިހާރު އިންޑިއާގެ މިނިސްޓަރުންނަށް މަރުހަބާ ކިޔަން ތިބޭކަމަށް ވިދާޅުވެ އެކަމަށް ވެސް ފާޑުވިދާޅުވެފައެވެ. އަދި ވެރިކަމަށް އައުމަށްޓަކައި ކީ ގިނަ ވާހަކަތައް މިއަދު ބަދަލުވެފައިވާކަން ފާހަގަ ކުރެއްވިއެވެ.

ޔާމީން މިހެން ވިދާޅުވެފައި މިވަނީ މި ސަރުކާރުން އިންޑިއާ އާއިއެކު ހާރިޖީ ގުޅުންތައް ބަދަހިކުރާނެކަމަށާއި އެއްވެސް ގައުމަކާއި ދެކޮޅުވެރިކަމެއް ނޯންނާނެކަމަށް ތަކުރާރުކޮށް ބުނަމުން ދަނިކޮށެވެ.