ޖަލުގައި ހުންނަވައިގެން ޕާކިސްތާނުގެ ކުރީގެ ބޮޑުވަޒީރު އިމްރާން ޚާން އޮކްސްފޯޑްގެ ޗާންސެލަރު ކަމަށް ކުރިމަތިލައްވައިފިއެވެ.

ޖަލުގައި ބަންދުކޮށްފައިވާ ޕާކިސްތާނުގެ ކުރީގެ ބޮޑުވަޒީރު އިމްރާން ޚާން އިނގިރޭސިވިލާތުގެ މަޝްހޫރު ޔުނިވާސިޓީ އޮފް އޮކްސްފޯޑްގެ ޗާންސެލަރަކަށް ވުމަށް އެދި ހުށަހަޅާފައިވާ ހާމަކޮށްފައި ވަނީ އޭނާގެ ޕާޓީންނެވެ.

ޚާން އަކީ އޮކްސްފޯޑްގެ ކުރީގެ ދަރިވަރެއް ކަމަށް ވީއިރު އޭނާ އެ މަގާމަށް ކުރިމަތިލެއްވުމަށް ރަސްމީކޮށް ހުށަހެޅީ ޚާންގެ ޕާކިސްތާން ތަހްރީކް އިންސާފް (ޕީޓީއައި) ގެ ލަންޑަންގައި ހުންނަ ތަރުޖަމާނު ސައިދު ޒުލްފިކަރު ބުޚާރީ މެދުވެރިކޮށް ކަމަށް އެ ޕާޓީން މީސް މީޑިއާ ޕްލެޓްފޯމުން ހާމަކުރެ އެވެ.

ޕީޓީއައިގެ ޕޯސްޓުގައި ބުނީ ގާނޫނާ ހިލާފަށް އަހަރަކަށް ވުރެ ގިނަ ދުވަހު ޖަލުގައި ހުރި ނަމަވެސް، ޚާން އަދިވެސް ހުރީ އޭނާގެ އުސޫލުތަކާއެކު ކަމަށެވެ. އަދި ޚާން ޗާންސެލަރަކަށް ވެއްޖެނަމަ އޭނާ ވާނީ އެ މަގާމު އަދާކުރާ އޭޝިއާ ނަސްލުގެ ފުރަތަމަ މީހާ އަށް ކަމަށް ޕީޓީއައި އިން ވަނީ ބުނެފައެވެ.

މީގެ އިތުރަށް ޕީޓީއައި އިން ބުނީ އެއީ ހަމައެކަނި ޕާކިސްތާނަށް ލިބޭނެ ރީތި ނަމެއް ނޫން ކަމަށާއި، އެއީ މުޅި އޭޝިއާ އާއި ދުނިޔޭގެ އެހެން ގައުމުތަކަށްވެސް ލިބޭނެ ވަރަށް ބޮޑު ކާމިޔާބަކަށް ވާނެ ކަމަށެވެ.

ކުރީގެ ބޮޑުވަޒީރު ޚާންގެ ޕާޓީން މިގޮތަށް އިއުލާންކޮށްފައިވަނީ ހޮންކޮންގުގެ އެންމެ ފަހުގެ އިނގިރޭސި ގަވަރުނަރު ކްރިސް ޕެޓެން އޮކްސްފޯޑްގެ ޗާންސެލާގެ މަގާމުން ވަކިވާނެކަން ފެބްރުއަރީ މަހު އިއުލާން ކުރެއްވުމުންނެވެ.