ކޮންމެ ކުއްޖަކީވެސް ތަފާތު ކުއްޖެކެވެ. އެކިކުދިން މޮޅުވާނީ އެކި ކަންކަމަށެވެ. ނަމަވެސް ކޮންމެ މަޔަކުވެސް އަދި ބަފަޔަކުވެސް އެމީހެއްގެ ދަރިންނަކީ ކާމިޔާބު ކުދިބަޔަކަށް ވުމަށް އެދޭނެއެވެ. އަދި ދަރިން ކާމިޔާބު ކުދީންނަށް ވާތަން ދެކެންވެސް ބޭނުންވާނެއެވެ. އެހެންކަމުން ދަރިފުޅު ކާމިޔާބު ކުއްޖަކަށް ހަދަން ބޭނުންވާނަމަ އެކުދިންގެ ކިބައިގައި ބައެއް އާދަތައް ކުޑައިރުއްސުރެ އަށަގަންނުވަން މަސައްކަތް ކުރުމަކީ މައިންބަފައިންގެ ޒިންމާއެކެވެ. މިފަހަރު މި ހިމަނާލަނީ ދަރިފުޅު ކާމިޔާބު ކުއްޖަކަށް ހަދަން ބޭނުންވާނަމަ އެކުއްޖާގެ ކިބައިގައި އަށަގަންނަވަން ޖެހޭ ބައެއް އާދަތަކެވެ.

ފޮތް ކިޔުން:

ފޮތް ކިޔުމަކީ ކުއްޖާގެ ވިސްނުން ތަރައްގީ ކުރުމަށް އެހީވެދޭ އަދި ކުއްޖާގެ ބަސްކޮށާރު މުއްސަންދި ކުރުމަށް އެހީވެދޭ ކަމެކެވެ. އަދި ހަމަ އެހެންމެ މިކަމުގެ ސަބަބުން ކުއްޖާގެ ކިޔުމުގެ ގާބިލިއްޔަތު އިތުރުވެ، މައްސަލަތައް ހައްލު ކުރުމުގައި "ކްރިޓިކަލް ތިންކިން" ބޭނުން ކުރަންވެސް ފަސޭހަވެއެވެ. މި ސިފަތަކަކީ ކާމިޔާބު ކުއްޖަކަށް ވާން ބޭނުންނަމަ ކޮންމެހެން ހުންނަން ޖެހޭ ސިފަތަކެވެ. އެހެންކަމުން ކުއްޖާއަށް ފޮތް ކިޔުމަށް ބާރު އެޅުމަކީ ބެލެނިވެރިންގެ ޒިންމާއެކެވެ. ކުއްޖާ ކުޑައިރުއްސުރެންވެސް ކޮންމެ ދުވަހަކު އެކުއްޖާއަށް ގަވާއިދުން ފޮތް ކިޔުމަށް ނަސޭހަތްތެރިވެދީ މި އާދަ ކުދިންގެ ކިބައިގައި އަށަގަންނަން ޖެހެއެެވެ.

ސްކުރީނާ ދުރުކުރުން:

ޓެކްނޮލޮޖީގެ ގޮތުން ކުރިއަރަަފައިވާ މި ޒަމާނުގައި ޓެކްނޮލޮޖީއަކީ އަޅުގަނޑުމެންގެ ދިރިއުޅުމުގައި ބޮޑު ރޯލެއް އަދާ ކުރާ އެއްޗެކެވެ. ނަމަވެސް ދަރިން ތަރުބިއްޔަތު ކުރާއިރު އެކުދިން ސްކްރީނާ ދުރުކުރުމަކީ ވަރަށް މުހިންމުކަމެކެވެ. މާބޮޑަށް ސްކްރީނާ ގާތްވާނަމަ ކުދިންގެ ހެދި ބޮޑުވުމަށް ނޭދެވޭ އަސަރު ކުރާނެއެވެ. ސްކްރީނާ ދުރުގައި ބޮޑު ކުރާ ކުދިންނަށް އެހެން މީހުންނާ މުއާމަލާތު ކުރަން އެނގި، ކަންކަމަށް ލޯހުޅުވި، އާކަންތައްތައް ދަސްވެ އަދި މައްސަލަތައް ހައްލު ކުރަން އެނގެއެެވެ. މި ސިފަތަކަކީ ދިރިއުޅުމުގައި ކާމިޔާބުވާން ބޭނުންނަމަ އެކުއްޖެއްގެ ކިބައިގައި ކޮންމެހެން ހުންނަން ޖެހޭ ސިފަތަކެވެ. އެހެންކަމުން ދަރިން ތަރުބިއްޔަތު ކުރާއިރު ސްކްރީންތަކާ ވީހާވެސް ދުރުގައި ބޮޑުކުރުމަކީ ވަރަށް މުހިންމު ކަމެކެވެ.

ގަޑިން ގަޑިއަށް ނިދުން:

ނިންޖަކީ ކުއްޖާ ހެދިބޮޑުވުމުގައި ވަރަށް މުހިންމު ދައުރެއް އަދާކުރާ އެއްޗެކެެވެ. ކުއްޖާއަށް ބޭނުންވާ ވަރަށް ނިދި ލިބޭނަމަ އެކުއްޖާގެ މޫޑު ރަނގަޅުވެ، ކަންކަމަށް ސަމާލުކަން ދެވޭ މިންވަރު އިތުރު ވެއެވެ. އަދި ހަމަ އެހެންމެ ރަނގަޅަށް ނިދާނަމަ ކުއްޖާގެ ވިސްނުން ތޫނުވެއެވެ. މި ސިފަތަކަކީވެސް ކާމިޔާބު ކުއްޖެއްގެ ކިބައިގައި ކޮންމެހެން ހުންނަން ޖެހޭ ސިފަތަކެވެ. އެހެންކަމުން ދަރިން ތަރުބިއްޔަތު ކުރާއިރު އެކުދިންގެ ކިބައިގައި މި އާދަ އަށަގަނުވަައި، އެކުދިންނަށް ގަޑިން ގަޑިއަށް ނިދުމަށް ބާރު އެޅުމަކީ ކޮންމެ މައެއްގެ ވެސް އަދި ބަފައެއްގެ ވެސް ޒިންމާއެކެެވެ.

މަސްދަރު: ޓައިމްސް އޮފް އިންޑިއާ