ކުރީގެ ރައީސް ޔާމީން އަބްދުލްގައްޔޫމްގެ ވެރިކަމުގައި ހެދި ސިނަމާލެ ބުރިޖުގެ އެއް ލޭން މަދުކަން ރައީސް ޔާމީނަށް އެނގިވަޑައިގަތީ މާ ފަހުން ކަމަށް ވިދާޅުވެ ރައީސް ޑރ. މުހައްމަދު މުޢިއްޒަށް ކީރިތިކުރެއްވެންދެން "ބަވާލި" ކަމަށް ރައްޔިތުންގެ މަޖިލީހުގެ ރައީސް އަބްދުއް ރަހީމް ވިދާޅުވެއްޖެ އެވެ.

ރައީސް ޔާމީންގެ ވެރިކަމުގައި ހައުސިން މިނިސްޓަރުކަމުގައި މިހާރުގެ ރައީސުލްޖުމްހޫރިއްޔާ ޑރ. މުއިއްޒު ހުންނެވިއިރު ބުރިޖުގެ އެންމެހާ ކަންކަން ކުރިއަށް ގެންދިޔައީ ރައީސް މުއިއްޒުގެ ބެއްލެވުމުގެ ދަށުން ނެވެ.

ބުރިޖުގެ މަޝްރޫއު އެންމެ ފުރަތަމަ އިއުލާންކުރި އިރު ބައިސްކަލު ދުއްވަން ލޭނެއްވެސް ހާއްސަކޮށްފައި އޮތެވެ،

ނަމަވެސް ބުރިޖު ނިމިގެން ދިޔައިރު އެ ލޭނެއް ނުހަދަ އެވެ.

ރޭ ސަންގުޓީވީން ގެނެސްދިން ޕްރޮގްރާމެއްގައި އަބްދުއް ރަހީމް ވިދާޅުވީ ބުރިޖުން ލޭނެއް މަދުކަން ރައީސް ޔާމީންއަށް އެނގިވަޑައިގަތީ ރިޔާސީ އިންތިހާބުގެ އެންމެ ފަހު ދުވަސްކޮޅު ބުރިޖު ހުޅުވަން މަސައްކަތް ކުރަމުން ދިޔަ އިރު ކަމަށް ވިދާޅުވެފައިވާ ކަމަށެވެ.

އަދި އެކަމާ ގުޅިގެން ރައީސް ޔާމީން ވަރަށް ބޮޑަށް ކޯފާވި ކަމަށް ވެސް އަބްދުއްރަހީމް ވިދާޅުވި އެވެ.

"އޭރު ސަކީނާ މަންޒިލްގައި ޕާޓީ އޮފީސް ހިނގަމުން ދާނީ. އެ ތަނުގައި ކެބިނެޓުގެ ވަޒީރުންނާއި އަދި ޕާޓީގެ އިސް މީހުންނާއެކު ބޭއްވި ބައްދަލުވުމެއްގައި ވެސް ޔާމީން، އޭރުގެ ހައުސިން މިނިސްޓަރު މުއިއްޒަށް ބަވާލި މަންޒަރާއި އެ އަޑު އަހާނެ އޭރު ކެބިނެޓުގައި ތިއްބެވި ވަޒީރުން ވެސް އަދި އަޅުގަނޑުމެންވެސް. ރައީސް މުއިއްޒު ކީރިތި ކުރައްވަންދެން ބަވާލި. އެ ދުވަހު ޔާމީން ވިދާޅުވީ ބުރިޖުގެ އެއް ލޭން މަދުކަން މިއަދުއޭ ތިމަންނައަށް މި އެނގުނީ." އަބްދުއްރަހީމް ވިދާޅުވި އެވެ.

ނަމަވެސް އަބްދުއްރަހީމް ވިދާޅުވީ ރައީސް ޔާމިނު އެކަމުގައި ވެސް ހެއްދެވީ އިތުރުފުޅު ކަމަށާއި ބުރިޖު ހަދާ ތަނަށް އެތައް ފަހަރަކު ރައީސް ޔާމީން ވަޑައިގެންނެވިއިރު ބްރިޖު ހަދަނީ އެ ލޭން ނުލައިކަން އެމަނިކުފާނަށް ކަނޑައެޅިގެން އެނގިވަޑައިގަންނަވާނެ ކަމަށެވެ.

ޑރ. މުޢިއްޒަކީ އޭރުވެސް ރައީސް ޔާމިން އެހާ ގަޔާވާ ބޭފުޅެއް ނޫންކަން ހާމަކުރައްވަމުން އަބްދުއްރަހީމް ވިދާޅުވީ މުޢިއްޒު ވަޒީރުކަމުން ވަކިކުރަންވެސް އެތައް ފަހަރަކު އުޅުއްވި ކަމަށެވެ.