ދުނިޔޭގެ އެންމެ ދުވަސްވީ ސްލޮތު އުމުރުން 54 އަހަރުގައި މަރުވެއްޖެއެވެ.

ރިޕޯޓްތައް ބުނާގޮތުން ދުނިޔޭގެ އެންމެ ދުވަސްވީ ސްލޮތު ކަމަށްވާ "ޖޭން" މަރުވީ ޖަރުމަނުގެ ޒުލެއްގައެވެ. 1969 ގައި އުފަންވި މި ސްލޮތު މަރުވިއިރު 54 އަހަރުގެ ޖަނަވާރަކަށް ވީއިރު، ޖަރުމަނުގެ ކްރެފެލްޑު ޒުލުގައި މީތި ދިރިއުޅޭތާ 38 އަހަރުވެފައިވާ ކަމަށް ވެއެވެ. މި ސްލޮތުގެ މަރުގެ ހަބަރަކީ މީތި ބެލުމުގެ މަސައްކަތް ކުރި ފަރާތްތަކަށް ލިބުނު ވަރަށް ބޮޑޫ ހިތާމައެކެވެ.

54 އަހަރުގެ ސްލޮތު ޖޭން އަށް 22 ދަރިން ލިބިފައިވާއިރު މި ހުރިހާ ޖަނަވާރެއްވެސް އުޅެނީ ޖަރުމަނުގައި ހުންނަ ކްރެފެލްޑު ޒުލުގައެވެ. ޖޭން އަށް އެންމެ ފަހުން ދަރިއެއް ލިބިފައިވަނީ މިއަހަރުގެ މާޗު މަހުގައި ކަމަށްވީއިރު، އެފަހުންވެސް ޖޭންގެ ހާލު ރަނގަޅުކަމަށް ޒުލުގެ ރިކޯޑުތަކުން އެނގެއެވެ.

ޒުލުން މައުލޫމާތު ދޭ ގޮތުގައި މި ސްލޮތު ޒުލަށް ގެންދިޔަ ދުވަހުން ފެށިގެން މަރުވުމާ ހަމައަށްވެސް ދުވަހަކުވެސް ބޮޑު ބައްޔެއް ޖެހިގެން ޑޮކްޓަރަށް ދައްކާކަށް ނުޖެހެއެވެ. އަދި މި ސްލޮތަކީ ވަރަށް ގަދައަށް ނިދާ ޖަނަވާރެއް ކަމަށާއި، އޭގެ އެންމެ ފަހު ދުވަސްތައް ހޭދަކޮށްފައިވަނީ ގަސްގަހުގައި ނިދުމުގައި ކަމަށްވެސް ޒޫ ބަލަހައްޓާ ފަރާތްތަކުން ވަނީ ބުނެފައެެވެ.

ޖޭން އަށް ދުނިޔޭގެ އެންމެ ގިނަދުވަސްވީ ސުލޮތުގެ ލަގަބު ލިބި ގިނިސް ވޯލްޑު ރިކޯޑެއް ލިބިފައިވަނީ 2021 ގައެވެ. މި ޖަނަވާރަކީ އާންމުކޮށް ގުދުރަތީ މާހަައުލު ތަކުގައި އުޅޭނަމަ 20-30 އަހަރު ވަންދެން ދުނިޔޭގައި އުޅޭ ޖަނަވާރެކެވެ. ނަމަވެސް ހިފަހައްޓައިގެން ގެންގުޅޭނަމަ މި ޖަނަވާރުގެ އުމުރު ދިގުވާކަމަށް ރިޕޯޓުތައް ބުނެއެވެ.