ބޮލީވުޑްގެ ފިލްމީ ތަރި އަދި މަޝްހޫރު ފިލްމު އުފެއްދުންތެރިޔާ ކަރަން ޖޯހަރުގެ ދަރްމާ ޕްރޮޑަކްޝަން އިން އުފައްދާ ފިލްމުތައް ނެރުމުގެ ކުރިން ސްކްރީނު ނުކުރުމަށް ނިންމައިފިއެވެ.

ބޮލީވުޑް ހަންގާމާގައިވާ ރިޕޯޓެއްގައި ބުނެފައިވަނީ ދަރްމާ ޕްރޮޑަކްޝަން އިން އުފައްދާ ފިލްމުތައް ނެރުމުގެ ކުރިން ސްކްރީން ނުކުރުމަށް ނިންމައި ކުންފުނީގެ ސީއީއޯ އަޕޫރްވާ މެހެތާ އާއި ކަރަން ޖޯހަރު ބަޔާނެއް ނެރެފައިވާ ކަމަށެވެ. އަދި މި ބަދަލުގެ ސަބަބުން ދަރްމާ ޕްރޮޑަކްޝަންސްގެ ފިލްމުތައް ޕްރޮމޯޓު ކުރާ ގޮތަށް ބަދަލު އަންނާނެ ކަމަށްވެސް ރިޕޯޓުގައި ވެއެވެ.

އަދި މި ބަދަލު ގެނައި ސަބަބުވެސް އެމީހުން ވަނީ ބަޔާން ކޮށްފައެވެ. އެގޮތުން މި ބަދަލު ގެނައީ ފިލްމު ބަލާ މީހުންނަށް ފިލްމު އެންމެ ފުރިހަމަ ގޮތުގައި ތަޖުރިބާ ކުރުމުގެ ފުރުސަތު ދިނުމަށް ކަމަށާއި، ފިލްމުގެ ފޯރި ދަމަހައްޓަން ކަމަށް ބަޔާނުގައި ވެއެވެ. އަދި މިއީ އުނދަގޫ ނިންމުމެއް ނަމަވެސް، މިއީ ކޮންމެހެން ކުރަން ޖެހޭ ކަމެއް ކަމަށްވެސް ބަޔާނުގައި ވެއެވެ.

އަދި ޕްރީ ސްކްރީނިންތައް ނުބާއްވަން ނިންމި ކަމުގައި ވީނަމަވެސް ހަމަ ކުރިއެކޭވެސް އެއްފަދައިން ޕްރެސް ސްކްރީނިންތައް ކުރިއަށް ގެންދާނެ ކަމަށްވެސް ދަރްމާ ޕްރޮޑަކްޝަންސްގެ ބަޔާނުގައި ވެއެވެ.

ދަރްމާ ޕްރޮޑަކްޝަންސް އިން ދެން އެންމެ އަވަހަށް ނެރޭނީ ގިނަ ބަޔަކު އިންތިޒާރު ކުރަމުން އަންނަ ފިލްމު "ޖިގުރާ" އެވެ. މި ފިލްމުގެ ލީޑުން ފެންނާނީ އާލިޔާ ބަޓު އަދި ވެދަންގު ރެއިނާއެވެ.