19 ވަނަ ރައްޔިތުންގެ މަޖިލީހުން 39 ބިލިއަން ރުފިޔާގެ މަޝްރޫތަކަށް ބަޖެޓުކޮށްފައި އޮތީ އެންމެ 3.6 ބިލިއަން ރުފިޔާ ކަމަށް ޢިމާރާތްކުރުމާއި ބިނާރާ ބެހޭ ވަޒީރު ޑރ. އަބްދުﷲ މުއްތަލިބް މިއަދު ވިދާޅުވެއްޖެ އެވެ.

ވަޒީރު މުއްޠަލިބު މިހެން ވިދާޅުވީ ރައީސް އޮފީހުގައި މިއަދު ބޭއްވެވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުންނެވެ.

އެގޮތުން މުއްޠަލިބު ވިދާޅުވީ މި ސަރުކާރުން ވެރިކަމާ ހަވާލުވިއިރު 39 ބިލިއަން ރުފިޔާގެ 322 މަޝްރޫއުގައި ސޮއިކޮށްފައި އޮތް ކަމަށެވެ. ނަމަވެސް ނިމިދިޔަ 19 ވަނަ މަޖިލީހުން ފާސް ކުރި ބަޖެޓުގައި މި މަޝްރޫތައް ކުރިއަށް ގެންދިއުމަށް ހިމަނާފައިވަނީ އެންމެ 3.6 ބިލިއަން ރުފިޔާކަމަށް މުއްޠަލިބު ވަނީ ވިދާޅުވެފައެވެ.

މުއްޠަލިބު ވިދާޅުވީ މި މަޝްރޫތަކުގެ ތެރެއިން 190 މަޝްރޫއަކީ އެމްޓީސީސީ އާއި އާރްޑިސީއާ ހަވާލުކޮށްފައިވާ މަޝްރޫތައް ކަމަށެވެ. މީގެ ތެރެއިން 63 މަޝްރޫއެއްގެ މަސައްކަތް ފަށާފައިވެސް ނުވާއިރު މަސައްކަތް ފަށާފައިވާ 127 މަޝްރޫތަކުގެ ތެރެއިން 68 މަޝްރޫއެއްގެ މަސައްކަތް އޮތީ ހުއްޓިފައި ކަން ވަޒީރު ފާހަގަ ކުރެއްވިއެވެ.

ސަރުކާރަށް މަޝްރޫތަކަށް ހަރަދު ކުރެވޭނީ ބަޖެޓުގައި އޮންނަ މިންވަރަށް ކަމަށާއި ނަމަވެސް މަޖިލީހުން ފާސްކޮށްފައިވަނީ މަޝްރޫޢުތަކުގެ ބައި ކުޅަ ބަޔަށްވާ ފައިސާ ކަމަށް މުއްޠަލިބު މިއަދު ވިދާޅުވިއެވެ.

“39 ބިލިއަން ރުފިޔާގެ މަޝްރޫ ހިންގުމަށްޓަކައި ބަޖެޓުގަ ކުރިއަށް ދާ މަޝްރޫތަކަށް ހިމަނާފައި އޮތީ 3.6 ބިލިއަން ރުފިޔާ. މިއީ 2024 އަހަރުގެ ޕްރޮޖެޓްތައް ހިންގުމަށް ބޭނުންވާ އަދަދުގެ ބައި ކުޅަ ބައި.” މުއްޠަލިބް ވިދާޅުވިއެވެ.

މުއްޠަލިބު މިހެން ވިދާޅުވެފައިވާއިރު މިއަހަރަށް ފާސްކުރި ބަޖެޓުން ޚަރަދުތައް ހަމަނުޖެއްސޭނެތީ ސަރުކާރުން މިހާރު ވަނީ މަޖިލީހަށް ސަޕްލިމެންޓަރީ ބަޖެޓެއް ހުށައަޅުއްވާފައެވެ.