ރާއްޖޭން އިންޑިއާއަށް ކަނޑައަޅާފައި ހުންނަވާ ސަފީރު އިބްރާހިމް ޝަހީބުގެ ސަފީރުކަމުގެ ދައުރު ހަމަވެ، އެ މަގާމަށް ފޮރިން މިނިސްޓްރީގެ އެޑިޝަނަލް ސެކްރެޓަރީގެ މަގާމުގައި ހުންނެވި އާއިޝަތު އަޒީމާ އައްޔަން ކުރުމަށް ރައްޔިތުންގެ މަޖިލީހުން ރުހުންދީފިއެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި އިންޑިއާ ސަފީރު ކަމަށް އަޒީމާ އައްޔަނު ކުރުމަށް ފާސްކޮށްފައިވަނީ ވޯޓުގައި ބައިވެރިވި 79 މެންބަރުންގެ އިއްތިފާގުންނެވެ.

އަޒީމާ މީގެ ކުރިން ވަނީ ޗައިނާގައި ހުންނަވާ ރާއްޖޭގެ ސަފީރުކަމުގެ މަގާމު 2019 އިން 2023 އަށް އަދާކުރަށްވާފައެވެ.

އިންޑިއާގައި ހުންނަވާ ރާއްޖޭގެސަފީރުކަމުގެ މަޤާމުގައި މިހާރު ހުންނެވި އިބްރާހިމް ޝަހީބު އެ މަޤާމަށް އައްޔަން ކުރައްވާފައިވަނީ ކުރީގެ ރައީސް ޞާލިޙްގެ ސަރުކާރުގައި ނޮވެމްބަރު 2022 ގައެވެ.

ފޮރިން ސާވިސް ގާނޫނު ބުނާގޮތުން، ސަފީރުކަމުގެ މަގާމުގައި ބޭފުޅަކަށް ހުންނެވޭނީ ތިން އަހަރުގެ މުއްދަތަށެވެ. ސަފީރު ކަމުގައި ޝަހީބުގެ ތިން އަހަރުގެ މުއްދަތު މިހާރު ވަނީ ހަމަވެފަ އެވެ.