އެމްޑީޕީ ސަރުކާރުން އިސްދޫ ދާއިރާގެ ކުރީގެ މެންބަރު އަލީ ޙަމީދުގެ ކުންފުންޏަށް 44 މިލިއަން ރުފިޔާ ދިން މައްސަލަ ބެލުމަށް މަޖިލީހުގެ މާލިއްޔަތު ކޮމިޓީން ފާސްކޮށްފިއެވެ.

މާލިއްޔަތު ކޮމިޓީގެ މިއަދުގެ ބައްދަލުވުމުގައި އިސްދޫ ދާއިރާގެ ކުރީގެ މެންބަރު އަލީ ހަމީދުގެ ކުންފުންޏަށް އާސަންދައިން ދިން 44 މިލިއަން ރުފިޔާގެ މައްސަލަ ތަހުޤީޤު ކުރުމަށް ފުލުހުންނަށް ހުށަހެޅުމަށް ހުށައެޅުއްވީ މަޖިލީހުގެ ނާއިބުރައީސް އަދި ދިއްގަރު ދާއިރާގެ މެންބަރު އަހުމަދު ނާޒިމެވެ.

އެ ހުށަހެޅުމަށް ހިތަދޫ މެދު ދާއިރާގެ މެންބަރު އަހުމަދު އަޒާނާއި އޭދަފުށީ ދާއިރާގެ މެންބަރު އަހުމަދު ސަލީމް ތާއީދު ކުރަށްވާފައިވެއެވެ. އަދި މި މައްސަލަ ފުލުހުންނަށް ހުށަހެޅުމަށް ކޮމިޓީން ފާސްކޮށްފައިވަނީ ބައްދަލުވުމުގައި ބައިވެރިވި ހަތް މެންބަރުންގެ އަޣުލަބިއްޔަތުންނެވެ.

މި މައްސަލައިގެ ތަފްސީލް ކޮމިޓީއަށް ޙިއްސާ ކުރަށްވަމުން ނާޒިމް ވިދާޅުވީ 2016 ވަނަ އަހަރު އާސަންދައިގެ ހޮސްޕިޓަލެއް އެޅުމަށް 61 މިލިއަން ރުފިޔާއަށް އެ ކުންފުންޏާ މަސައްކަތް ހަވާލުކުރި ނަމަވެސް، އާސަންދައަށް ކުރިމަތިވި މާލީ ދަތިތަކާ ހެދި އެ މަސައްކަތް މަޑުޖައްސާލަން ޖެހުނު ކަމަށެވެ.

އޭގެ ފަހުން ކުރީ ސަރުކާރުގައި ބަދަލު ދިނުމަށް އެކުލަވާލި ކޮމިޓީއަށް ނޯތު ކޯސްޓް ކުންފުނިން މައްސަލަ ހުށަހެޅުމުން ރައީސް އޮފީހުން ވަނީ އާސަންދައިގެ އާ އޮފީސް އިމާރާތް އެޅުމުގެ މަސައްކަތް އެ ކުންފުންޏަށް 144 މިލިއަން ރުފިޔާއަށް ހަވާލުކުރަން ނިންމާފަ އެވެ.

އަދި މި މަސައްކަތުގެ އެޑްވާންސްގެ ގޮތުގައި 2023 ވަނަ އަހަރު ދެ ފަހަރެއްގެ މަތިން 44 މިލިއަން ރުފިޔާ އެ ކުންފުންޏަށް ދޫކޮށްފައިވާއިރު، މިހާތަނަށް އެއްވެސް މަސައްކަތެއް ފަށާފައި ނުވެއެވެ.

އަލީ ޙަމީދަކީ ނިމިދިޔަ ރިޔާސީ އިންތިޚާބުގެ ދުވަސްވަރު އެމްޑީޕީއާ ގުޅިވަޑައިގެންނެވި ބޭފުޅެކެވެ.