ނަސްރުގެ ދުވަހުގެ ހަރަކާތްތަކުގައި ރައީސް ޑރ. މުހައްމަދު މުއިއްޒު ވަރަށް ފުރިހަމައަށް ޝާމިލުވެވަޑައިގެންފައިވާ ކަމަށް ވިދާޅުވެ ހޯމް މިނިސްޓަރު އަލީ އިހުސާން ރައީސްއަށް ވަރަށް ބޮޑަށް ތައުރީފް ކުރައްވައިފި އެވެ.

ނަސްރުގެ ދުވަސް ފާހަގަކުރުމުގެ ހަރަކާތްތައް މިއަދު ފެށީ އިސްލާމީ މަރުކަޒުގައި ބޮޑު ޖަމާޢަތުގައި ކުރެވުނު ފަތިސް ނަމާދާއެކު އެވެ. އެ ބޮޑު ޖަމާއަތުގައި ރައީސް ބައިވެރިވެ ވަޑައިގެންނެވި އިރު އެމަނިކުފާނު ފަހުން ވަނީ ތިނެއް ނޮވެންބަރުގެ ހަނދާނީ ބިނާގައި ދިދަ ޖެހުމާއި، ގާޑު މައުންޓް ކުރުމުގެ ރަސްމިއްޔާތުގައި ވެސް ބައިވެރިވެވަޑައިގެންފަ އެވެ.

އެކަމާ ގުޅިގެން ހޯމް މިނިސްޓަރު އިހުސާން އެކްސްގައި މިއަދު ވިދާޅުވީ އޭނާ ކުރިން އަސްކަރިއްޔާގައި ހޭދަކުރެއްވި 11 އަހަރާއި އޭގެ ފަހުން އައި އަށް އަހަރުގައި ވެސް ދެ ރަސްމިއްޔާތުގައި ބައިވެރިވެ ވަޑައިގެންނެވި ރައީސަކު ކުރިން ފެނިވަޑައިގަންފައިނުވާ ކަމަށެވެ. އަދި ގިނަ ފަހަރު އޭގެން އެއްވެސް ރަސްމިއްޔާތެއްގައި ވެސް ރައީސަކު ބައިވެރިނުވާކަން ވެސް މިނިސްޓަރު ފާހަގަ ކުރެއްވި އެވެ.

އެހެންވެ ނޮވެމްބަރު ތިނެއްގެ ޝަހީދުންނަށް ރައީސް ކުރެއްވި އިހުތިރާމަށް މިނިސްޓަރު ޝުކުރު އަދާކުރެއްވި އެވެ.

ނަސްރުގެ ދުވަސް ފާހަގަކުރަނީ 1988 ވަނަ އަހަރުގެ ނޮވެމްބަރު މަހުގެ ތިން ވަނަ ދުވަހު ދިވެހީންގެ ބަޔަކު އިސްވެ ތިބެ، ލަންކާގެ ޓެރަރިސްޓު ޖަމާއަތަކުން ރާއްޖެއަށް ދިން އުދުވާނީ ހަމަލާ އިން ހޯދި ކާމިޔާބު ފާހަގަކުރުމަށެވެ.