އެސްޓީއޯގެ ރޭޓުގައި ތެޔޮ ފޯރުކޮށްދޭން ރާއްޖޭގެ ކޮންމެ އަތޮޅެއްގައި ތެޔޮ ރައްކާކުރެވޭނޭ ނިޒާމު ގާއިމުކުރުމުގެ މަޝްރޫއު އިފްތިތާހުކޮށްފިއެވެ.

މިއަދު ބޭއްވި ޚާއްޞަ ރަސްމިއްޔާތެއްގައި އެ މަޝްރޫއު އިފްތިތާހުކޮށްދެއްވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒެވެ.

ރާއްޖޭގެ ހުރިހާ އަތޮޅެއްގައި، މަދުވެގެން އެއް ރަށުން އެސްޓީއޯ ރޭޓުގައި ތެޔޮ ފޯރުކޮށްދޭ ނިޒާމެއް ގާއިމު ކުރުމަކީ ރައީސް ޑރ. މުޙައްމަދު މުޢިއްޒުގެ ރިޔާސީ ވައުދެކެވެ.

އެ ވައުދު ފުއްދުމަށް އެސްޓީއޯއިން ވަނީ ފެބްރުއަރީ 2026 ގެ ކުރިން ރާއްޖޭގެ ހުރިހާ އަތޮޅެއްގައި ފިއުލް ސެޓަޕް ގާއިމުކޮށް، މަސްވެރިންނާއި އާންމު ރައްޔިތުންނަށް ތެޔޮ ލިބޭނޭ ނިޒާމު ގާއިމުކުރުން ނިންމާފައެވެ.

އެކި ފިޔަވަހިތަކަކަށް ބަހާލައިގެން އެ މަޝްރޫއު ކުރިއަށް ގެންދަން ނިންމާފައިވާ އިރު ފެބްރުއަރީ 2025ގެ ކުރިން، އައްޑޫ ސިޓީ ހުޅުމީދޫގައި ސެޓަޕް ގާއިމުކުރުމަށް ވަނީ ތާވަލުކޮށްފައެވެ.

އަދި 2025 ވަނަ އަހަރުގެ އޮކްޓޯބަރު މަހުގެ ނިޔަލަށް، ތިލަދުންމަތީ އުތުރުބުރީ އިހަވަންދޫ، ތިލަދުންމަތީ ދެކުނުބުރީ ހަނިމާދޫ، ނިލަންދެއަތޮޅު އުތުރުބުރީ ނިލަންދޫ، ހުވަދުއަތޮޅު ދެކުނުބުރީ ފަރެސްމާތޮޑާ އަދި ފުވައްމުލައް ސިޓީގައި ސެޓަޕް ގާއިމުކުރާނެ ކަމަށް ރައީސް އޮފީހުން ބުނެފައި ވެއެވެ.

އަދި 2026 ގެ ފެބްރުއަރީ މަހުގެ ނިޔަލަށް، މިލަދުންމަޑުލު އުތުރުބުރީ މިލަންދޫ، މިލަދުންމަޑުލު ދެކުނުބުރީ މަނަދޫ، މާޅޮސްމަޑުލު ދެކުނުބުރީ ތުޅާދޫ، ފެލިދެއަތޮޅު ފެލިދޫ، ކޮޅުމަޑުލު ހިރިލަންދޫ، މާޅޮސްމަޑުލު އުތުރުބުރީ ދުވާފަރު، އަރިއަތޮޅު އުތުރުބުރީ މަތިވެރި، މުލަކަތޮޅު މުލައް، ނިލަންދެއަތޮޅު ދެކުނުބުރީ ކުޑަހުވަދޫ އަދި ހައްދުންމަތީ ގަމުގައި ސެޓަޕް ގާއިމުކުރާނެ ކަމަށް ވެސް ރައީސް އޮފީހުން ބުނެފައި ވެއެވެ.

ފާދިއްޕޮޅު ފެލިވަރާއި ހުވަދުއަތޮޅު އުތުރުބުރީ ކޫއްޑޫގައި ހުންނަ އެފްއެސްއެމް ޝެޑުން ހެޔޮ އަގުގައި މިހާރުވެސް ދަނީ ތެޔޮ ފޯރުކޮށްދެމުންނެވެ.