30 ކޯހެއް ހިންގައި 1،000 ޒުވާނުން ތަމްރީނުކުރަން ހަޔަރ އެޑިއުކޭޝަން މިނިސްޓްރީން ނިންމައިފިއެވެ.

ހަޔަރ އެޑިއުކޭޝަން މިނިސްޓްރީން އިންތިޒާމްކޮށްގެން ކުރިއަށް ގެންދިޔުމަށް ހަމަޖެހިފައިވާ މި ތަމްރީން ޕްރޮގްރާމަކީ މޯލްޑިވިސް އެންހޭންސިން އެމްޕްލޮޔަބިލިޓީ އެންޑް ރެޒިލިއަންސް އޮފް ޔޫތް (މީރީ) ޕްރޮޖެކްޓުގެ ދަށުން ކުރިޔަށްގެންދާ ޕްރޮގްރާމެކެވެ.

މީރީ ޕްރޮޖެކްޓްގެ އެއްބާރުލުމާ އެކު ކުރިޔަށް ގެންދާ މި ޕްރޮގްރާމުގެ ދަށުން، ފަތުރުވެރިކަން، އިމާރާތްކުރުން، އައިސީޓީ، މަސްވެރިކަން އަދި ދަނޑުވެރިކަން ފަދަ ރާއްޖެއަށް ބޭނުންވާ އެކި ދާއިރާތަކުން 30 ކޯހެއް ކުރިއަށް ގެންދަން ހަމަޖެހިފައިވެ އެވެ. މި ކޯސްތަކަކީ ނެޝަނަލް ސެޓްފިކެޓް ލެވެލް ތިނެއްގެ ކޯސް ތަކެއް ކަމަށް މިނިސްޓްރީން ވަނީ ބުނެފައެވެ.

އުމުރުން 16-35 އަހަރާއި ދެމެދުގެ ޒުވާނުންނަށް ޚާއްޞަކޮށްގެން ކުރިއަށްގެންދާ މި ޕްރޮގްރާމްގެ ދަށުން ޖުމްލަ 1،000 ޒުވާނުންނަށް ތަމްރީނުވުމުގެ ފުރުސަތު ވަނީ ހުޅުވާލައިފައެވެ.

ދިވެހިރާއްޖެއަށް އެންމެ ބޭނުންވާ ދާއިރާތައް ދެނެގަނެ، އެ ދާއިރާތަކުން ޒުވާނުން ތަމްރީނުކުރުމަކީ ރައީސުލްޖުމުހޫރިއްޔާ ޑރ. މުޙައްމަދު މުޢިއްޒުގެ ވައުދުތަކުގެ ތެރޭގައި ހިމެނޭ ކަމެއްކަން ފާހަގަ ކުރެވެއެވެ.

މި ސިޔާސަތު ތަންފީޒުކުރުމަށް، ހަޔަރ އެޑިޔުކޭޝަން މިނިސްޓްރީން އަންނަނީ މީރީ ޕްރޮޖެކްޓާއި މޯލްޑިވްސް ނެޝަނަލް ސްކިލްސް ޑިވެލޮޕްމަންޓް (އެމްއެންއެސްޑީއޭ) މެދުވެރިކޮށް، "ފިއުޗަރ-ރެޑީ ޔޫތު" ޕްރޮގްރާމް ފަދަ ޒުވާނުން ބިނާކުރުމަށް އަމާޒުކޮށް އެތައް މަސައްކަތްތަކެއް ކުރަމުންނެވެ.