ރާއްޖޭގައި އާބަން ސެންޓަރުގެ ގޮތުގައި ތަރައްޤީ ކުރުމަށް ހަމަޖެހިފައިވާ ރަށްތައް ސަރުކާރުން މިއަދު ކަނޑައަޅައިފިއެވެ.

މި ސަރުކާރުން ރާއްޖޭގައި 7 އާބަން ސެންޓަރު ތަރައްޤީ ކުރާނެކަން ރައީސް ޑރ. މުޢިއްޒު އިއުލާނު ކުރައްވާފައިވަނީ މިއަހަރުގެ މާޗު މަހު ރ. އުނގޫފާރުގެ ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގައެވެ.

އެގޮތުން ހައުސިން މިނިސްޓްރީން މިއަދު ނެރުނު ނޫސް ބަޔާނެއްގައި ވާގޮތުން އާބަން ސެންޓަރު ގާއިމުކުރުމަށް ހަމަޖެހިފައިވަނީ ރ. އުނގޫފާރާއި ބ. އޭދަފުއްޓާއި ޅ. ނައިފަރާއި އދ. މަހިބަދޫ އާއި ފ. ނިލަންދޫ އާއި ދ. ކުޑަހުވަދޫ އާއި ލ. ފޮނަދޫގައެވެ.

ނޫސް ބަޔާން pic.twitter.com/DqdSBzIZSh

— Ministry of Housing, Land and Urban Development (@MHLUDmv) November 9, 2024

މީގެ ކުރިން ރައީސް ޑރ. މުޢިއްޒު ވިދާޅުވެފައިވަނީ ރާއްޖޭގެ މެދު ރާސްތާ، އަދި ދުރު ރާސްތާގެ ތަރައްޤީއަށް ބަލާއިރު، އެންމެ އުތުރުގެ ހަތަރު އަތޮޅުގެ އިންޓަރގްރޭޓެޑް ޑިވެލޮޕްމަންޓް ޒޯނަކާއި، އެންމެ ދެކުނުގެ ހަތަރު އަތޮޅުގެ އިންޓަރގްރޭޓެޑް ޑިވެލޮޕްމަންޓް ޒޯނެއްގެ އިތުރުން ރާއްޖޭގައި 7 އާބަން ސެންޓަރެއް ތަރައްޤީ ކުރައްވާނެ ކަމަށެވެ.

އެގޮތުން ރައީސް ވިދާޅުވެފައިވަނީ އާބަން ސެންޓަރުތައް ގާއިމް ކުރާނީ 20 އަހަރުގެ މާސްޓަރ ޕުލޭނެއްގެ ދަށުން ކަމަށާއި އެމާސްޓަރ ޕުލޭންގެ އަމަލީ މަސައްކަތް މިހާރު ފަށާފައިވާ ކަމަށެެވެ.

ސަރުކާރުން މިހާރުވަނީ އާބަން ސެެންޓަރުތައް ގާއިމުކުރުމާ ބިލެއް މަޖިލީހަށް ހުށައަޅާފައެވެ. އެ ބިލު މިހާރު އޮތީ ޤައުމީ ތަރައްޤީ ކޮމިޓީ އާއި ލާމަރުކަޒީ ކޮމިޓީގެ ޖޮއިންޓް ކޮމިޓީގައެވެ.