ސަރަހައްދީ ތަރައްގީ އެއްފަސްކޮށް، މީހުން އުޅޭ ރަށްތަކުގެ އަދަދު މަދުކުރަން ޖެހެނީ ރާއްޖެއަކީ ތިމާވެށީގެ ގޮތުން ނާޒުކު ގައުމަކަށް ވާތީ ކަމަށް ރައީސް ޑރ. މުޙައްމަދު މުޢިއްޒު ރޭ ވިދާޅުވެއްޖެއެވެެ.

ޖުމްހޫރީ ދުވަސް ފާހަގަކުރަން ދަރުބާރުގޭގައި ރޭ ބޭއްވި ޖަލްސާގައި ވާހަކަފުޅު ދައްކަވަމުން ރައީސް ޑރ. މުޙައްމަދު މުޢިއްޒު ވިދާޅުވީ، ރާއްޖެއަކީ ތިމާވެށީގެ ގޮތުން ވަރަށް ނާޒުކު ގައުމެއް ކަމަށެވެ. ރައީސް ވިދާޅުވީ ރާއްޖޭގައި 200 ނުވަތަ 186 ރަށުގައި މީހުން ދިރިއުޅެވެން ނެތް ކަމަށާއި އެ ހަގީގަތް ޤަބޫލު ކުރަންޖެހޭ ކަމަށެެވެ.

އެމަނިކުފާނު ވިދާޅުވީ މޫސުމީ ބަދަލުތަކަކީ ގަބޫލު ކުރަންޖެހޭ ހަޤީޤަތެއް ކަމަށާއި އެކަމާ ދެކޮޅު ހެދެން ނެތް ކަމަށެވެ. ރާއްޖޭގެ ސަރަހައްދީ ތަރައްގީ އެއްފަސްކޮށް މީހުން ދިރިއުޅޭ ރަށުގެ އަދަދު މަދުކުރަންޖެހެނީ އެހެންވެގެން ކަމަށް ރައީސް މުޢިއްޒު ވިދާޅުވިއެެވެ.

President Dr @MMuizzu and First Lady Madam Sajidha Mohamed attended the official ceremony to commemorate Republic Day in the Maldives.

Republic Day is celebrated annually on 11th November, marking the country's transition from a monarchy to a republic in 1968. pic.twitter.com/jjZQhkeMA3

— The President's Office (@presidencymv) November 10, 2024

ރައީސް މުޢިއްޒު އިތުރަށް ވިދާޅުވީ އާބަދީ މަދު ރަށްރަށުގައި ކައުންސިލްތަކުގައި ތިބޭ މެންބަރުން އަދަދު މަދުކުރުމަށް ގާނޫނަށް ގެންނަންޖެހޭ ބަދަލުތައް ގެންނާނެ ކަމަށެވެ. އަދި ރާއްޖެއަށް މުހިއްމީ ރައްޔިތުން ތަމްސީލުވާ ގޮތަށް އިންތިހާބީ ކައުންސިލެއް އޮތުން ކަމަށް ރައީސް މުޢިއްޒު ވިދާޅުވި އެވެ. ރައީސް މިރޭ ވިދާޅުވީ 100 މީހުން ހަމަނުވާ ރަށްރަށުގައި 5 ކައުންސިލަރުން ތިބޭ ކަމަށާއި ކައުންސިލްތަކުގައި ތިބެނީ ވެސް އެއް އާއިލާ އަކަށް ނިސްބަތްވާ މީހުން ކަމަށެވެ.

އެއީ އެކަން ވެގެންވާނެ ގޮތެއް ނޫން ކަމަށް ރައީސް މުޢިއްޒު ވިދާޅުވިއެވެ. ރައީސް މުޢިއްޒު ވިދާޅުވީ ކައުންސިލަރުންގެ އަދަދު މަދުކުރުމަކީ ކައުންސިލްތަކުގެ ބާރު ކަނޑުވާލަން ކުރާ ކަމެއް ކަަމަށް ބައެއް ފަރާތްތަކުން ބުނަމުންދާ ކަމަށެވެ. އެހެން ނަމަވެސް އެއީ ހަގީގަތެއް ނޫން ކަމަށް ރައީސް މުޢިއްޒު ވިދާޅުވި އެވެ.

މީގެ އިތުރުން ރައީސް މުޢިއްޒު ވިދާޅުވީ ރާއްޖޭގެ ދެމެހެއްޓެނިވި ތަރައްޤީގެ އަމާޒުތައް ހާސިލުކުރުމަށްޓަކައި ތިމާވެށި ހިމާޔަތް ކުރުމަށް އަދުގެ ސަރުކާރުން ގިނަ މަސައްކަތްތަކެއް ކުރަމުންދާ ކަމަށެވެ. ރައީސް ވިދާޅުވީ ނޮވެމްބަރ 11 ވަނަ ދުވަހު އަޒަރުބައިޖާންގައި ފަށާ ކޮޕް-29 ސަމިޓުގައި، ދިވެހި ރައްޔިތުންގެ ޙައްޤުގައި ބައިވެރިވެވަޑައިގަންނަވާނެ ކަމަށެވެ. އަދި ތިމާވެށި ހަލާކު ކުރަމުންދާ ފަރާތްތަކުގެ އަތުން، އެ ގެއްލުން ފޫބެއްދުމުގެ ބަދަލެއްގެ ގޮތުގައި ފައިސާ ހޯއްދެވުމަކީ އެމަނިކުފާނުގެ މި ދަތުރުފުޅުގެ މަޤްޞަދެއްކަމަށް ރައީސް މުޢިއްޒު ވިދާޅުވިއެވެ.

ރައީސް ވަނީ މޫސުމީ ނޭދެވޭ ބަދަލުތަކުގެ ސަބަބުން ދިވެހިރާއްޖެއަށް ކުރިމަތިވެފައިވާ ނާޒުކު ޙާލަތު ރަނގަޅު ކުރުމަށްޓަކައި، އެކަމަށް ބޭނުންވާ މާލީ އެހީތެރިކަން ހޯއްދެވުމަށް، ރައްޔިތުންގެ ފަރާތުން ރައްޔިތުންގެ އަޑުއިއްވަވާނެ ކަމުގެ ޔަގީން ކަން ދެއްވާފައެވެ.

ރައީސް އިތުރަށް ވިދާޅުވީ ޤައުމު ތަރައްޤީ ކުރުމުގެ ކަންކަން ކުރިއަށް ގެންދަވަން ބޭނުންފުޅުވަނީ ދެމެހެއްޓެނިވި ރޫޙެއްގައި ކަމަށެވެ. އެގޮތުން ފާއިތުވެދިޔަ އަހަރެއްހާ ދުވަހުގެ ތެރޭގައި މިރޮނގުން ކުރައްވާފައިވާ ބައެއް ކަންކަމުގެ މައްޗަށް ޚުލާސާ ގޮތެއްގައި ރައީސް ވަނީ އަލިއަޅުއްވާލައްވާފައެވެ.

ރައީސް ވިދާޅުވީ ރާއްޖޭގައި ބޭނުންކުރާ ޖުމުލަ ހަކަތައިގެ ތެރެއިން، ތިމާވެއްޓާ ރައްޓެހި، ސާފު ހަކަތައިގެ ނިސްބަތް، 33 އިންސައްތައަށް މަތި ކުރުމަކީ އަމާޒެއް ކަމަށެވެ. މި އަމާޒަށް ވާސިލުވުމަށްޓަކައި މިދިޔަ އަހަރެއްހާ ދުވަހުގެ ތެރޭގައި 15 މެގަވޮޓްގެ ސޯލާޕަވަރ އިތުރަށް އުފައްދަން ފެށިފައި ވާ ކަމަށާއި، 164 މެގަވޮޓްގެ ސޯލާޕަވަރ އުފެއްދުމުގެ މަޝްރޫޢު މިހާރުވެސް ކުރިއަށްދާކަން އެމަނިކުފާނު ފާހަގަކުރެއްވިއެވެ.

ރައީސް ދެއްކެވި ވާހަކަފުޅުގައި "މަގޭ ސޯލާ މަޝްރޫޢު" ފަށައިގެން ކުރިއަށްދާއިރު، 5 މިލިއަން ގަސް އިންދާ، ރާއްޖެ ފެހި ކުރުމުގެ މަސައްކަތުގެ ތެރެއިން 4 ލައްކައަށްވުރެ ގިނަ ގަސް މިހާރުވެސް އިންދިފައިވާކަން ފާހަގަކުރެއްވިއެވެ. އަދި ބ. އަތޮޅުގެ އިތުރުން، އިތުރު 3 ރަށެއްގައި ބަޔޮސްފިޔަރ ރިޒަރވް ހަދަން ނިންމަވާފައިވާނެކަންވެސް އެމަނިކުފާނު ފާހަގަކުރެއްވިއެވެ. މީގެއިތުރުން 17 ރަށެއްގައި ކުނިކޮށި ހެދުމާއި، ކުނި އުފުލަން ޚާއްޞަ އުޅަނދުތަކެއް 99 ރަށަކަށް ހަދިޔާ ކުރުމާއި، ކުނި މެނޭޖު ކުރުމުގެ އިތުރު އެހެން އެހީތައް ފޯރުކޮށްދެވިފައި ވަނީ ތިމާވެށި ހިމާޔަތް ކުރުމުގެ ނިޔަތުގައި ކަމަަށް ރައީސް ފާހަގަކުރެއްވިއެވެ.