ދައުލަތަށް ލިބެންޖެހޭ ފައިސާގެ ތެރެއިން 3.7 ބިލިއަން ރުފިޔާ ހޯދައި މާލިއްޔާއަށް ވައްދާފައިވާ ކަމަށް ރައީސް ޑރ. މުޙައްމަދު މުޢިއްޒު ރޭ ވިދާޅުވެއްޖެއެވެ.

ޖުމްހޫރީ ދުވަހުގެ މުނާސަބާގައި ރޭ ބޭއްވި ޖަލްސާގައި ވާހަކަފުޅު ދައްކަވަމުން ރައީސް ޑރ. މުޙައްމަދު މުޢިއްޒު ވިދާޅުވީ، މިދިޔަ އަހަރެއްހާ ދުވަހުގެ ތެރޭގައި ދައުލަތަށް ލިބެންޖެހޭ ރައްޔިތުންގެ ފައިސާ ހޯދުމަށް ވަރަށް ގިނަ މަސައްކަތްތަކެއް ކޮށްފައިވާ ކަމަށެވެ. އެގޮތުން ދައުލަތަށް ލިބެންޖެހޭ ފައިސާ ހޯދުމަށް ޤާނޫނު ތަކާއި ގަވާއިދުތައް ވަރުގަދަކޮށް ތަންފީޒީ އިދާރާތަކުގެ މަސައްކަތް ހަރުދަނާކޮށްފައިވާ ކަމަށް ރައީސް މުޢިއްޒު ވިދާޅުވިއެެވެ. ރައީސް ވިދާޅުވީ ސަރުކާރުން ކުރި މަސައްކަތްތަކާއެކު ދައުލަތަށް ލިބެންޖެހޭ ފައިސާގެ ތެރެއިން 3.7 ބިލިއަން ރުފިޔާ މިހާތަނަށް ހޯދައި ރައްޔިތުން މާލިއްޔާއަށް ވައްދާފައިވާނެ ކަމަށެވެ.

"3.7 ބިލިއަން ރުފިޔާ ސަރުކާރަށް އެކި ފަރާތްތަކުން ދައްކަންޖެހޭ ކުރީ ދުވަސްތަކުގައި ޒަމާންތަކުގައި އަހަރުތަކުގައި ނުހޯދާ ފަސޭހަކޮށްލާފައި ހުރި ފައިސާ އެ 3.7 ބިލިއަން ރުފިޔާ އަޅުގަނޑުމެން ރައްޔިތުންގެ ފައިސާ އެއީ ހޯދާފައި ވައްދައިފިން ދައުލަތުގެ ރައްޔިތުންގެ އެކައުންޓަށް، އޭގެ ސަބަބުން އަޅުގަނޑުމެން ނަގަންޖެހޭ ދަރަނި ވެސް ވަނީ މަދުވެފައި،" ރައީސް މުޢިއްޒު ވިދާޅުވިއެވެ.

ދައުލަތަށް ލިބެންޖެހޭ 3.7 ބިލިއަން ރުފިޔާ ހޯދާފައިވާ ކަމަށް ރައީސް މުޢިއްޒު ވިދާޅުވެފައިވާއިރު ދައުލަތަށް ލިބެންޖެހޭ 13 ބިލިއަން ރުފިޔާ އެބަހުރި ކަމަށް އެމަނިކުފާނު މީގެ ކުރިން ވަނީ ވިދާޅުވެފައެވެ. ރައީސް ކުރިން ވިދާޅުވެފައިވަނީ އެފައިސާ ލިބިއްޖެނަމަ ރާއްޖެއަށް ދިމާވެފައިވާ ދަރަނީގެ މައްސަލަ ހައްލުވާނެ ކަމަށެވެ.

ރޭގެ ޖަލްސާގައި ވާހަކަފުޅު ދައްކަވަމުން ރައީސް މުޢިއްޒު ވިދާޅުވީ ސަރުކާރުން މަސައްކަތް ކުރަނީ ރައްޔިތުން މުއްސަނދި ކުުރުމަށް ކަމަށެވެ. އަދި ސަރުކާރުން ރައްޔިތުންނަށް ދޭން ޖެހޭ ފައިސާ ދެމުން އަދި ރައްޔިތުންނަށް ލިބެން ޖެހޭ ފައިސާ ވެސް ހޯދައިދިނުމަށް މަސައްކަތް ކުރާނެ ކަމަށް ރައީސް މުޢިއްޒު ވިދާޅުވިއެވެ.

ރައީސް ވިދާޅުވީ ކުރީގެ ސަރުކާރުން ކުދި އަދި މެދު ފަންތީގެ ވިޔަފާރިތައް ލައްވައި މަސައްކަތް ކުރުމަށްފަހު އެފަރާތްތަކަށް ދޭންޖެހޭ އެތަށް މިލިއަން ރުފިޔާ އެއް ނުދީ ހުރި ކަމަށެވެ. ރައީސް ވިދާޅުވީ މި ސަރުކާރު އައި ފަހުން އެފަދަ ފަރާތްތަކަށް 6.6 ބިލިއަން ރުފިޔާ ދޫކޮށްފައިވާނެ ކަމަށެވެ.

ރައީސް އިތުރަށް ވިދާޅުވީ މި ސަރުކާރު ހަވާލުވިއިރު ސޮވެރިން ޑިވެލޮޕްމަންޓް ފަންޑުގައި ހުރީ ދެ މިލިއަން ޑޮލަރު ކަމަށެވެ. އެހެން ނަމަވެސް މި ސަރުކާރުން 78 މިލިއަން ޑޮލަރު އެ ފަންޑަށް ޖަމާކޮށްފައިވާ ކަމަށް ރައީސް މުޢިއްޒު ވިދާޅުވި އެވެ.