ރައްޔިތުންނަށް ލިބިފައިވާ ބާރުތައް ދެމެހެއްޓުމުގެ މަސައްކަތް އާ ހިތްވަރަކާއެކު ކުރަންޖެހިފައިވާ ކަމަށް ކުރީގެ ރައީސް އިބްރާހިމް މުޙައްމަދު ޞާލިޙް ވިދާޅުވެއްޖެއެވެ.

ރައީސް ޞާލިޙް މިހެން ވިދާޅުވީ މިއަދު ފާހަގަކުރަމުންގެންދާ ޖުމުހޫރީ ދުވަހުގެ މުނާސަބާތުގައި ދިވެހި ރައްޔިތުންނަށް ތަހުނިޔާ ފޮނުއްވައި އެކްސްގައި ކުރެއްވި ޕޯސްޓެއްގައެެވެ. ރާއްޖޭގެ 07 ވަނަ ރައީސުލްޖުމުހޫރިއްޔާ އިބްރާހިމް މުޙައްމަދު ސާލިޙް ވިދާޅުވީ ޖުމުހޫރިއްޔަތެއްގައި ބާރުތައް ފެށިގެން އަންނަނީ ރައްޔިތުން ކިބައިން ކަމަށެވެ. ޤައުމުގެ އެންމެހައި ކަންކަމުގައި ރައްޔިތުންނަށް ލިބިދީފައިވާ ބާރުތައް ދެމެހެއްޓުމަކީ ޖުމުހޫރިއްޔަތެއްގެ އެންމެ ބޮޑު އެއް އަސާސް ކަމަށް ރައީސް ޞާލިޙް ވިދާޅުވިއެވެ.

"ޖުމްހޫރިއްޔަތެއްގައި ދައުލަތުގެ ބާރުތައް ފެށެނީ ރައްޔިތުންގެ ކިބައިން. އަދި ޤައުމުގެ އެންމެހާ ކަންކަމުގައި ރައްޔިތުންނަށް ލިބިދީފައިވާ ބާރުތައް ދެމެހެއްޓުމަކީ ޖުމްހޫރިއްޔަތެއްގެ އެންމެ މުހިއްމު އަސާސް ކަމުގަ ވީހިނދު މިއަދު މި ވަނީ މި މަސައްކަތް އާ ހިތްވަރަކާއެކު ކުރަންޖެހިފަ." ރައީސް ޞާލިޙް ވިދާޅުވިއެވެ.

ދިވެހިރާއްޖޭގައި ފުރަތަމަ ފަހަރަށް ޖުމްހޫރީ ވެރިކަމެއް އުފަންވީ ޖެނުއަރީ 1، 1953 ގައެވެ. ފުރަތަމަ ޖުމުހޫރިއްޔާގެ ހަމައެކަނި ރައީސަކީ މުޙައްމަދު އަމީން ދީދީއެވެ. މި ޖުމްހޫރީ ވެރިކަން ދެމިއޮތީ 7 މަހާއި ދުވަސްކޮޅެއް ވަންދެނެވެ. އޭގެ ފަހުން އަނެއްކާ ދިވެހިރާއްޖެ ރަސްކަމަކަށް ބަދަލުވެ 1954 ގައި އައްސުލްޠާން މުޙައްމަދު ފަރީދު ރަސްކަމަށް އިސްކުރެވުނެވެ. އޭގެ ފަހުން ދެވަނަ ޖުމްހޫރީ ވެރިކަން ގެނައީ ނޮވެންބަރު 11، 1968 ގައެވެ. ދެވަނަ ޖުމްހޫރިއްޔާގެ ފުރަތަމަ ރައީސަކީ ސުމުއްވުލް އަމީރު އިބްރާހީމް ނާޞިރު ރަންނަބަނޑޭރި ކިލެގެފާނަށެވެ.

މިއަދު މި ފާހަގަކުރަނީ ދެވަނަ ފަހަރަށް ދިވެހިން ޖުމްހޫރިއްޔަތެއް ގާއިމުކުރި ދުވަހެވެ.