20 ވަނަ ރައްޔިތުންގެ މަޖިލީހުގެ ދައުރު ނިންމާލާނީ މިވަގުތަށް ފައިހަމަވާގޮތަށް ޤާނޫނުތައް ބަދަލުކޮށްފައި ކަމަށް ރައްޔިތުންގެ މަޖިލީހުގެ ރައީސް ޢަބުދުއްރަޙީމް އަބުދުﷲ ވިދާޅުވެއްޖެއެވެ.

މިއަދު ފާހަގަކުރަމުން ގެންދާ ޖުމުހޫރީ ދުވަހާއި ގުޅިގެން ދައުލަތުގެ މީޑިޔާ، ޕީއެސްއެމްގެ ޕްރޮގުރާމަކަށް ދެއްވި އިންޓަވިއު އެއްގައި މަޖިލީހުގެ ރައީސް ޢަބުދުއްރަޙީމް ވިދާޅުވީ 20 ވަނަ މަޖިލީހުން ޤާނޫނުތަކަށް ގެންނަންޖެހޭ އިސްލާހުތައް ގެނައުމުގެ މަސައްކަތް ކުރަމުން ގެންދާ ކަމަށެވެ. އެގޮތުން ޤައުމުގައި ހުރި އިޖުތިމާޢީ ބޮޑެތި މައްސަލަތައް ހައްލުކުރަން ޤާނޫނަށް ގެންނަންޖެހޭ ބަދަލުތައް ގެންނަވާނެ ކަމަށް އަބުދުއްްރަޙީމް ވިދާޅުވިއެވެ.

"20 ވަނަ ރައްޔިތުންގެ މަޖިލިސް އިރާދަކުރެއްވިއްޔާ އަޅުގަނޑުމެން ނިންމާނީ މިވަގުތަށް ފައިހަމަވާގޮތަށް ޤާނޫނުތައް ބަދަލުކޮށްފައި،" މަޖިލީހުގެ ރައީސް ވިދާޅުވިއެވެ.

ރައްޔިތުންގެ މަޖިލީހުގެ ސުޕަ މެޖޯރިޓީ އޮތީ ސަރުކާރު ހިންގާ މައިޕާޓީ، ޕީއެންސީއަށެވެ. އެ މެޖޯރިޓީ އާއެކު ޤާނޫނު އަސާސީ އިސްލާހު ކުރުމުގެ ބާރު ވެސް ޕީއެންސީއަށް ލިބެއެވެ.