ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ސައުދީ ފަންޑް ފޮރ ޑިވެލޮޕްމަންޓްގެ ޗީފް އެގްޒެކެޓިވް އޮފިސަރ، ސުލްޠާން ބިން ޢަބްދުއްރަޙްމާން އަލްމަރްޝަދާ މިއަދު ބައްދަލުކުރައްވައިފިއެވެ

އެބައްދަލުވުން ބާއްވާފައިވަނީ ސައުދީ އަރަބިއްޔާގެ ރިޔާޟުގައި ކުރިއަށްދިޔަ ގުޅިފައިވާ އަރަބި އިސްލާމީ ސަމިޓުގެ ހަވާސާގެ ތެރެއިންނެވެ.

ރައީސް އޮފީހުން ބުނީ މި ބައްދަލުކުރެއްވުމުގައި ރާއްޖެއަށް މިވަގުތަށް އެހީތެރިކަން ބޭނުންވާ ދާއިރާތަކާއި، އިތުރު ދާއިރާތަކުން ގުޅުން ބަދަހިކުރެއްވުމާ ގުޅޭ ގޮތުން ފުޅާ ދާއިރާއެއްގައި ދެ ބޭފުޅުން މަޝްވަރާކުރައްވާފައިވާ ކަމަށެވެ. އަދި ސައުދީ ފަންޑުގެ އެހީގައި ރާއްޖޭގައި މިވަގުތު ކުރިއަށްދާ ބައެއް ބޮޑެތި މަޝްރޫޢުތަކުގެ މަޢުލޫމާތު ރައީސް ހިއްސާކުރައްވާފައިވާކަމަށް ރައީސް އޮފީހުން ބުނެއެވެ. އެގޮތުން ވެލާނާ އިންޓަނޭޝަނަލް އެއާޕޯޓް ތަރައްޤީކުރުމަށް ހިންގާ ބިޔަ މަޝްރޫޢުއާއި، ޢުމްރާނީ ތަރައްޤީގެ ދާއިރާއިން ކުރިއަށްދާ މަޝްރޫޢުތަކާއި، މަސްވެރިކަމާބެހޭ ސިނާޢަތުގައި ކުރިއަށްދާ އެކި މަޝްރޫޢުތަކާ ގުޅޭ މަޢުލޫމާތު ހިއްސާކުރައްވާފައިވާ ކަމަށް ރައީސް އޮފީހުން މައުލޫމާތުދެއެެވެ. އަދި މި މަޝްރޫޢުތަކުގެ މަސައްކަތް އަވަހަށް ނިންމުމާ ގުޅޭގޮތުން ދެ ބޭފުޅުން ވަނީ މަޝްވަރާކުރައްވާފައެވެ.

މި ބައްދަލުކުރެއްވުމުގައި ސައުދީ ޑިވެލޮޕްމަންޓް ފަންޑުގެ ސީއީއޯ ވަނީ ރާއްޖެއަށް އެއްބާރުލުން ދިނުމުގައި ދެމި ތިބޭނެކަމުގެ ޔަގީންކަން އަރުވާފައެވެ.