އދ. އިން ކްލައިމެޓް ޗޭންޖާ ގުޅޭ ފްރޭމްވޯކް ކޮންވެންޝަންގެ ދަށުން ކޮންމެ އަހަރަކު ބާއްވާ ކޮންފަރެންސް އޮފް ދަ ޕާޓީސް (ކޮޕް) ސަމިޓުގައި ބައިވެރިވެވަޑައިގަތުމަށް ރައީސް ޑރ. މުހައްމަދު މުއިއްޒު އަޒަރުބައިޖާނަށް ފުރާވަޑައިގެންފި އެވެ.

އިއްޔެއިން ފެށިގެން މި މަހުގެ 22 އާ ހަަމައަށް އަޒަރުބައިޖާންގެ ވެރިރަށް ބަކޫގައި ކުރިއަށްދާ އެ ސަމިޓަށް އެންވަޔަަރަމަންޓް މިނިސްޓަރު ތޯރިގު އިބްރާހިމްއާއި ސަރުކާރުގެ އިސް ވަފުދެއް ވެސް މިދިޔަ އާދިއްތަ ދުވަހު ވަޑައިގެންނެވި އިރު ރައީސް މުއިއްޒު ބަކޫއަށް ފުރާވަޑައިގެންނެވީ މިއަދު އެވެ.

މި ސަމިޓުގައި ރާއްޖޭގެ ފަރާތުން އިއްވަވާ ހާއްސަ ގައުމީ ބަޔާން އިއްވަވައި، މަތީ ފަންތީގެ އެކިއެކި އިވެންޓްތަކާއި މަޝްވަރާތަކުގައި ބައިވެރިވެވަޑައިގަތުމުގެ އިތުރުން ބައެއް ގައުމުތަކުގެ ވެރިންނާ ވެސް ރައީސް ބައްދަލުކުރައްވާނެކަމަށް ރައީސް އޮފީހުން ބުނެފައި ވެއެވެ.

ކޮޕް29 ބައްދަލުވުމަކީ ދިވެހިރާއްޖެއިން ދެމެހެއްޓެނިވި ތަރައްޤީގެ ލަނޑުދަނޑިތަކާއި މޫސުމީ ބަދަލުތަކަށް ހޭނުމަށް ކުރަމުންދާ މަސައްކަތަށް އަލިއަޅުވާލުމަށް ފުރުސަތު ލިބޭ ވަރަށް މުހިންމު ބައްދަލުވުމަކަށްވާއިރު ރައީސް މުއިއްޒުއަކީ ސްމޯލް އައިލެންޑް ޑިވެލޮޕިން ސްޓޭޓްސް (ސިޑްސް) އަށް ދިމާވާ ތަފާތު ގޮންޖެހުންތަކަށް ވަރަށް ބޮޑަށް ވަކާލާތު ކުރައްވާ ބޭފުޅެކެވެ.

ކޮޕް 29 ގައި ކްލައިމެޓް ފައިނޭންސްގެ އާ ލަނޑުދަނޑިތައް އެކަށައެޅުމާއި ކާބަން މާކެޓް އޮޕަރޭޝަނަލައިޒް ކުރުމާބެހޭ ގޮތުން މަޝްވަރާ ކުރުމާއި އެއްބާރުލުން އިތުރުކުރުމާއި އެންޑީސި ތަރައްގީ ކުރުމަށް ހުރި ހުރަސްތައް ނައްތާލުމާބެހޭ ގޮތުން މަޝްވަރާ ކުރާނެއެވެ.

އޭގެ އިތުރުން، މަތީ ފަންތީގެ އެކިއެކި މަޝްވަރާތަކުގައި ވެސް ރައީސް ބައިވެރިވެ ވަޑައިގަންނަވާނެކަމަށް ރައީސް އޮފީހުން ބުނެފައި ވެއެވެ.