މޫސުމީ ބަދަލުތަކުގެ ސަބަބުން ދިމާވާ ކާރިސާތަކުން ރައްކާތެރިކަން ހޯދުމަށް ފިޔަވަޅު އެޅުމަށާއި ކާބޯތަކެތީގެ ނިޒާމުގެ ދެމެހެއްޓެނިވިކަން ހޯދުމަށް އޭޝިއަން ޑިވެލޮޕްމަންޓު ފަންޑުން ރާއްޖެއަށް ފައިނޭންސިން ޕެކޭޖެއް ހަމަޖައްސައިފިއެވެ.

އޭޝިއަން ޑިވެލޮޕްމަންޓް ފަންޑުން ރާއްޖެއަށް ހަމަޖައްސާފައި ވަނީ 21.95 މިލިއަން ޑޮލަރުގެ ފައިނޭންސިން ޕެކޭޖެކެވެ. އެ ޕެކޭޖްގެ ދަށުން ހަތަރު މިލިއަން ޑޮލަރު ދެނީ ލޯނެއްގެ ގޮތަށެވެ. އަދި ބާކީ 17.95 މިލިއަން ޑޮލަރު ދެނީ އޭޝިއަން ޑިވެލޮޕްމަންޓް ފަންޑުގެ ދަށުން ދޭ ގްރާންޓެއްގެ ގޮތުގައި ކަމަށް އޭޑީބީން ބުނެފައިވެއެވެ.

އޭޑީބީން ބުނީ މި ފައިސާ ރާއްޖެއަށް ދެނީ މޫސުމީ ބަދަލުތަކުގެ ސަބަބުން ދިމާވާ ކާރިސާތަކުން ރައްކާތެރިވުމަށް އެޅޭ ފިޔަވަޅުތައް ވަރުގަދަކުރުމަށާއި ކާބޯތަކެތީގެ ނިޒާމުގެ ދެހެމެއްޓެނެވިކަން ހޯދުމުގެ މަސައްކަތްތަކަށް ކަމަށެވެ.

ކާރިސާތަކުން ރައްކާތެރިވުމަށް ހަރުދަނާ ފިޔަވަޅުތައް އެޅުމުގެ ތެރޭގައި މޫސުމާ ބެހޭ ގައުމީ އިދާރާ، މެޓްގައި މިހާރު ހުރި ވަސީލަތްތައް ޒަމާނީ ފެންވަރަށް އަޕްގްރޭޑް ކުރުމަށާއި ރިއަލް ޓައިމް ވެދާ މޮނިޓަރިން ނިޒާމެއް ހޯދުން ހިމެނެއެވެ. އަދި ރާއްޖެ ފަދަ ކަނޑުގެ ސަރަހައްދު ބޮޑު ގައުމަކަށް މުހިންމު އާރލީ ވާނިން ސިސްޓަމެއް ވެސް މިއެހީގެދަށުން ހަރުކުރެވޭނެ ކަމަށް އެ ބޭންކުން ވަނީ ބުނެފައެވެ.

މި ފައިސާގެ އެހީގައި ރާއްޖޭގައި މޫސުމީ ބަދަލުތަކުގެ ސަބަބުން ދިމާވާ ކަންކަމަށް ރައްޔިތުން އިތުރަށް ހޭލުންތެރިކުރުވުން ވެސް މިއެހީގައި ހިމެނޭ ކަމަށް އޭޑީބީން ވަނީ ބުނެފައެވެ.

ކާބޯތަކެތީގެ ނިޒާމުގެ ދެމެހެއްޓެނިވިކަން ހޯދުމަށް ކްލައިމެޓް ސްމާޓް އާބަން ޕާމިންގެ ވަސީލަތްތައް ރާއްޖެއަށް ތައާރަފްކޮށް އެ ވަސީލަތްތައް ބޭނުންކުރާނެގޮތް ހއ. އަތޮޅާއި އައްޑޫ ސިޓީގެ ރައްޔިތުންނަށް ދަސްކޮށްދޭނެ ކަމަށް ވެސް އޭޑީބީން ވަނީ ބުނެފައެވެ.