2028 ވަނަ އަހަރު އަންނަ އިރު ރާއްޖޭގެ އިގްތިސާދު 10 ބިލިއަން ޑޮލަރަށް ޖެއްސޭނެ ކަމަށް އިކޮނޮމިކް މިނިސްޓަރު މުހައްމަދު ސައީދު ވިދާޅުވެއްޖެއެވެ.

ސަޢީދު މިހެން ވިދާޅުވީ އެޗްޑީސީން ހިންގާ އެންމެ މުހިއްމު ޕްރޮޖެކްޓްތައް އިފްތިތާހު ކުރުމަށް ރޭ ބޭއްވި "ޓްރާންސްފޯމިން ޓުމޯރޯ" ހަފުލާގައި ވާހަކަފުޅު ދައްކަވަމުންނެވެެ. އިކޮނޮމިކް މިނިސްޓަރު މުހައްމަދު ސައީދު ވިދާޅުވީ 2028 ވަނަ އަހަރު އަންނަ އިރު ރާއްޖޭގެ އިގްތިސާދު 10 ބިލިއަން ޑޮލަރަށް ޖެއްސޭނެ ކަމުގެ ޔަގީންކަން އެބައޮތް ކަމަށެވެ. ސަޢީދު ވިދާޅުވީ މިއަހަރަކީ އިގްތިސާދީ ނުރައްކާތެރި ހާލަތެއް ކުރިމަތިވި އެއް އަހަރު ކަމަށާއި، އެހެން ނަމަވެސް، ރައީސް ޑރ. މުހައްމަދު މުއިއްޒުގެ ލަފާފުޅާ އެކު، މި ނުރައްކާތެރި ހާލަތު މެނޭޖުކުރެވިފައިވާ ކަމަށެވެެ. މިނިސްޓަރު ސަޢީދު ވިދާޅުވީ އުމްރާނީ ބޮޑެތި މަސައްކަތްތަކެއް އަންނަ އަހަރު ފެށިގެންދާނެ ކަމަށެވެ. އަދި ބޯހިޔާވަހިކަމުގެ ރަން ޒަމާނެއް ދިވެހި ރައްޔިތުންނަަށް ހޯދައިދިނުމަށް ދައުލަތުގެ އަންނަ އަހަރުގެ ބަޖެޓުގައި ދެ ބިލިއަން ރުފިޔާ ހިމަނާފައިވާ ކަމަށް ސަޢީދު ވިދާޅުވިއެވެ. ސަޢީދު ވިދާޅުވީ އަންނަ އަހަރަކީ ރާއްޖޭގެ އިގްތިސާދުގައި ހަކަތަ އުފެދި، ދިވެހި ވިޔަފާރިވެރިން އަވަދިނެތި އުޅޭނެ އަހަރަކަށް ވާނެ ކަމަށެވެ.

"2028 އަންނައިރު 6.5 ބިިލިއަން ޑޮލަރުގައި މިއޮތް ޖީޑީޕީ 10 ބިލިއަން ޑޮލަރަށް ޖެއްސޭކަން އަޅުގަނޑުމެންނަށް ޔަގީން،" ސަޢީދު ވިދާޅުވިއެެވެ.