ރާއްޖޭގެ އެންމެ އާބާދީ ބޮޑު މާލެ ސަރަހައްދުގައި މަސްތުވާތަކެތި ވިއްކަމުން ދިޔަ 48 ތަނެއް ބަންދުކޮށްފައިވާ ކަމަށް ދިވެހި ފުލުހުންގެ ހިދުމަތުން ބުނެފިއެވެ.

މިއަދު ފުލުހުން ބޭއްވި ނޫސްވެރިންގެ ބައްދަލުވުމުގައި ޑްރަގް އެންފޯސްމެންޓް ޑިޕާޓްމެންޓުގެ ހެޑް، ސުޕްރިޓެންޑެންޓް އޮފް ޕޮލިސް، ނާހިދު ހުސެއިން ވިދާޅުވީ، ކެފޭ އުސޫލުން މާލޭގައި މަސްތުވާތަކެތި ބޭނުން ކުރުމުގެ ފުރުސަތު ދޭ ތަންތަން ބަންދުކުރަމުން އަންނަ ކަމަށެވެ.

ފުލުހުން ބުނީ މާލޭގެ އެކި ސަރަހައްދުތަކުގައި މަސްތުވާތަކެތީގެ މުއާމަލާތްކޮށް، މަސްތުވާތަކެތި ވިއްކަމުން އަންނަ ކަމަށް ތުހުމަތު ކުރެވޭ ތަންތަނުގައި ފުލުހުން ޑިއުޓީ ކުރަމުން އަންނަ ކަމަށެވެ.

މިއަދުގެ ނޫސްވެރިންގެ ބައްދަލުވުމުގައި ފުލުހުން ވަނީ މިހާތަނަށް މަސްތުވާތަކެތީގެ 683 މައްސަލައެއް އެ އިދާރާއަށް ރިޕޯޓް ކޮށްފައިވާކަން ހާމަކޮށްފައެވެ. އަދި އޭގެ ތެރެއިން 345 މައްސަަލައެއްގެ ތަހުގީގު ނިންމައި، ޕްރޮސެކިއުޓަރ ޖެނެރަލް (ޕީޖީ) އަށް ފޮނުވާފައިވާ ކަމަށް ފުލުހުން މައުލޫމާތު ދެއެވެ. އަދި ރާއްޖެއަށް މަސްތުވާތަކެތި އެތެރެކޮށްގެން 19 މައްސަލަ، 22 މީހެއްގެ މައްޗަށް ސާބިތުވާ ކަމަށް ހުކުމް ކޮށްފައިވާ ކަމަށް ވެސް ފުލުހުން ވަނީ ބުނެފައެވެ.

މަސްތުވާތަކެއްޗާ ދެކޮޅަށް ފުލުހުން ހިންގަމުން އަންނަ އޮޕަރޭޝަނުގައި މިހާތަނަށް 1،009 މީހުން ހައްޔަރުކޮށްފައިވާކަމަށް އެ އިދާރާއިން ވަނީ ބުނެފައެވެ. އަދި ރާއްޖޭގެ އެކި ސަރަހައްދުތަކުގައި ހިންގާ މިފަދަ އޮޕަރޭޝަންތަކުގައި މިހާތަނަށް 183 ކިލޯއަށްވުރެ ގިނަ މަސްތުވާތަކެތި އަތުލައިގެންފައިވާ ކަމަށް ފުލުހުން ވަނީ ބުނެފައެވެ.