އަރިއަތޮޅު އުތުރުބުރީ ރަސްދޫގައި ސަރުކާރުން އަޅަން ނިންމާފައިވާ 50 ހައުސިން ޔުނިޓްގެ ބިންގާ މިއަދު އަޅައިފި އެވެ.

މިކަމަކަށްޓަކައި ރަސްދޫގައި މިއަދު ބޭއްވި ރަސްމިއްޔާތެއްގައި މި ހައުސިން ޔުނިޓްތަކުގެ ބިންގާ އަޅުއްވައިދެއްވީ ގެދޮރުވެރިކަމާއި ބިމާ އުމްރާނީ ތަރައްޤީއާ ބެހޭ ވަޒީރު ޑރ. ޢަލީ ހައިދަރު އަޙްމަދެވެ.

ރަސްދޫގައި 50 ހައުސިން ޔުނިޓު އެޅުމަށް ހަވާލުކޮށްފައި ވަނީ އެސްޖޭ ކޮންސްޓްރަކްޝަން ޕްރައިވެޓް ލިމިޓެޑާއެވެ. އެ ކުންފުންޏާއި މި މަސައްކަތް ހަވާލުކޮށްފައިވަނީ ރައީސް އިބްރާހީމް މުޙައްމަދު ޞާލިޙުގެ ވެރިކަމުގައި މިދިޔަ އަހަރުގެ ސެޕްޓެންބަރު މަހުގެ ތެރޭގައެވެ.

ސަރުކާރުގެ ޕީއެސްއައިޕީ ބަޖެޓުގެ ދަށުން ކުރިއަށްގެންދާ މި މަޝްރޫއަކީ، 84.2 މިލިއަން ރުފިޔާގެ މަޝްރޫއެކެވެ. މި މަޝްރޫއުގައި ހިމެނެނީ 50 ހައުސިން ޔުނިޓް ކަމަށްވާއިރު، ކޮންމެ ހައުސިން ޔުނިޓެއްގައި 1000 އަކަފޫޓު ހުންނާނެ ކަމަށް ގެދޮރުވެރިކަމާއި ބެހޭ ވުޒާރާއިން މައުލޫމާތުދެއެވެ.

މި ހައުސިން ޔުނިޓްތަކުން ކޮންމެ ޔުނިޓެއްގައި ތިން ކޮޓަރި، ތިން ފާޚާނާ، ސިޓިން ރޫމް، ބަދިގެ، ކާގެ، ލޯންޑްރީ އަދި ސްޓޯ ރޫމް ހިމެނެއެވެ. މީގެއިތުރުން ހައުސިން ޔުނިޓްތަކުގައި ދިރިއުޅޭ މީހުންނަށް ހިތްފަސޭހަ މާހައުލެއް ގާއިމުކުރުމަށްޓަކައި ޔުނިޓްތައް ވަށައިގެން އަލި ކުރެވިގެންދާނެ ކަމަށާއި ޕާރކަކާއި ވެހިކަލް ޕާކް ކުރާނެ ސަރަހައްދެއް ގާއިމުކުރެވިގެންދާނެ ކަމަށް ގެދޮރުވެރިކަމާއި ބެހޭ ވުޒާރާއިން މައުލޫމާތުދެއެވެ.