ސަރުކާރު ހިންގާ މައި ޕާޓީ ޕީއެންސީ ފިޔަވައި ސިޔާސީ މަސައްކަތް ކުރާ ޕާޓީއެއް ނެތް ކަމަށާއި އަމާޒަކީ އެޕާޓީ އާއި ހަމަޔަށް ދެން އެހެން ޕާޓީއަކަށް ނާދެވޭ ވަރަށް މަސައްކަތް ކުރުން ކަމަށް ރައްޔިތުންގެ މަޖިލީހުގެ ރައީސް އަދި ޕީއެންސީގެ ޗެއަރޕަރސަން ޢަބްދުއްރަޙީމް ޢަބްދުﷲ ވިދާޅުވެއްޖެއެވެ.

ޕީއެންސީގެ އޮފީހުގައި ރޭ އޮތް ފޯމު ހަވާލުކުރުމުގެ ރަސްމިއްޔާތުގައި ވާހަކަދައްކަވަމުން ރައްޔިތުންގެ މަޖިލީހުގެ ރައީސް އަދި ޕީއެންސީގެ ޗެއަރޕަރސަން ޢަބްދުއްރަޙީމް ޢަބްދުﷲ ވިދާޅުވީ ރައީސް ޑރ. މުޢިއްޒުގެ އަމާޒާއި އެއްގޮތަަށް ޕީއެންސީ އަށް 75،000 މެންބަރުން ހަމަވެ އެޕާޓީގެ މެންބަރުންގެ އަަދަދު 80،000 އަށްވުރެ މައްޗަށް އަރާފައިވާ ކަމަށެވެ. އަދި އެޕާޓީއަށް ލިބުނު ކާމިޔާބަކީ ވޭތުވެ ދިޔަ އެއްއަހަރުގެ ތެރޭގައި ރައީސް ޑރ. މުޙައްމަދު މުޢިއްޒު ކޮށްދެއްވި ޚިދުމަތް ރައްޔިތުން އުފަލާއެކު ބަލައިގަތްކަމުގެ ހެތްކެއް ކަމަށް ޢަބްދުއްރަޙީމް ވިދާޅުވިއެވެ. އޭނާ ވިދާޅުވީ، ޕީއެންސީ ފިޔަވައި ސިޔާސީ މަސައްކަތްކުރާ ޕާޓީއެއް ނެތް ކަމަށެވެ. އެގޮތުން އެހެން ޕާޓީއަކުން ސިޔާސީ މަސައްކަތްކުރާތަން ފެނިވަޑައިނުގަންނަވާކަމަަށް ޢަބްދުއްރަޙީމް ވިދާޅުވިއެވެ. ޢަބްދުއްރަޙީމް ވިދާޅުވީ ޕީއެންސީއަކީ މިވަގުތު ރާއްޖޭގައި އޮތް އެންމެ ބޮޑު ޕާޓީ ކަމަށެވެ.

"ހަމަ ޔަގީންކަމާއެކު އަޅުގަނޑަށް ދަންނަވަން ކެރޭ މާލޭގައި ޕީއެންސީއަށްވުރެ މެންބަރުން ގިނަ އެހެން ޕާޓީއެއް ނޯއްނާނެ، ރާއްޖޭގެ އެއްވެސް ރަށެއްގައި ވެސް މިހާރު ހީއެއް ނުވޭ ޕީއެންސީއާއި ވާދަކުރެވޭނެ ޕާޓީއެއް އޮންނާހެނެއް، އަޅުގަނޑުމެންގެ އަމާޒަކީ އިރާދަކުރެއްވިއްޔާ ކުރިއަށް އޮތްތާގައި ވެސް އަޅުގަނޑުމެންނާ ހަމަޔަށް ދެން އިތުރު ޕާޓީއަކަށް މެމްބަރޝިޕްގެ ގޮތުން ވެސް ހަރަކާތުގެ ގޮތުންވެސް އަދި ރައްޔިތުންނާއި އޮންނަ ގުޅުމުގެ ތެރެއިން ވެސް އެހެން ބަޔަކަށް ނާދެވޭ ވަރަަށް މިޕާޓީގެ ހަރަކާތްތަށް ކުރިއަށް ގެންދިޔުން،" މަޖިލީހުގެ ފޮނަދޫ ދާއިރާގެ މެންބަރު އަދި މަޖިލީހުގެ ރައީސް ޢަބްދުއްރަޙީމް ޢަބްދުﷲ ވިދާޅުވިއެވެ.