ޓުއަރިޒަމް ވިޔަފާރިތަކަށް ލިބޭ ބޭރު ފައިސާއިން ބައެއް ބޭންކަށް މާރުކުރަން މަޖުބޫރުވާ ގޮތަށް އޮތް ގަވާއިދަށް ތާއީދު ނުކުރައްވާ ކަމަށް ކުރީގެ ރައީސް މުހައްމަދު ނަޝީދު ހާމަކުރަށްވައިފިއެވެ.

ރިސޯޓުތަކާއި އިންޓަގްރޭޓެޑް ރިސޯޓާއި ފަތުރުވެރިކަމުގެ އުޅަނދުފަހަރާއި ރިސޯޓު ހޮޓަލާއި ސިޓީ ހޮޓާ ފަދަ ތަންތަނުން އެ ތަންތަނަށް އަންނަ ކޮންމެ ފަތުރުވެރިއެއްގެ ބޮލަަކަށް 500 ޑޮލަރު މާރުކުރަން ލާޒިމްވާ ގޮތަށް ސަރުކާރުން ވަނީ ގަވާއިދެއް އެކުލަވާލާފައެވެ. އެގަވާއިދުގައި ބުނާގޮތުން 50 އެނދަށްވުރެ މަދު އެނދު ހުންނަ ގެސްޓުހައުސްތަކުން ޓޫރިސްޓެއްގެ ބޮލަކަށް 25 ޑޮލަރު މާރުކުރަންޖެހެއެވެ. އެފައިސާ މާރުކުރަންޖެހޭނީ އެ މަހެއްގައި އައި ޓޫރިސްޓުން ހިސާބުކުރުމަށްފަހު އެ މަސް ނިމޭ ދުވަހުން ފެށިގެން ތިންވަނައަށްވާ މަހުގެ 28 ވަނަ ދުވަހުގެ ކުރިން ކަމަށް ގަވާއިދުގައި ބުނެއެވެ. އެހެން ނަމަވެސް ރާއްޖޭގެ ރިސޯޓް އޯނަރުން ވަނީ އެފަދައިން ޑޮލަރު މާރުކުރުމަށް ދެކޮޅު ހަދައި އެކަން ސަރުކާރަށް އަންގައި ސިޓީ ފޮނުއްވާފައެވެ. 

އެކަމާ ގުޅިގެން ޓުއަރިޒަމް ވިޔަފާރިވެރިން ތިބޭ ވަޓްސް އެޕް ގްރޫޕަކަށް ކުރީގެ ރައީސް މުޙައްމަދު ނަޝީދު ފޮނުއްވި މެސެޖެއްގައި ވިދާޅުވީ، ޓޫރިޒަމް ވިޔަފާރި ތަކުން ދައުލަތަށް ނަގާ ޓެކްސްގެ ބޭރުން ދެން އިތުރު އެއްވެސް ކަމެއް ކުރަން، ރިސޯޓް ހިންގާ ވިޔަފާރިވެރިންނަށް ސަރުކާރުން އަންގައިގެން ނުވާނެ ކަމަށެވެ. އަދި ރައްޔިތުންގެ އަމިއްލަ ފައިސާ އިން ކުރަންވީ ކަންކަން ސަރުކާރަށް ނުނިންމޭނެ ކަމަށް ރައީސް ނަޝީދު ވިދާޅުވިއެވެ.

"ރިސޯޓްތަކުގެ ވެރިން ޓެކްސް ދައްކާ. ބާކީ އެއީ އެމީހުންގެ އަމިއްލަ ފައިސާ. ބަހައްޓަން ބޭނުންވާ ތަނެއްގައި ބެހެއްޓެން ވާނެ. ހަރަދުކުރަންވީ ގޮތެއް ވެސް އެ މީހުންނަށް ނިންމެން ވާނެ،" މަޖިލީހުގެ ކުރީގެ ރައީސް ވިދާޅުވިއެވެ.

މީގެ އިތުރުން ރައީސް ނަޝީދުގެ މެސެޖްގައި އިތުރަށް ވިދާޅުވީ ފޮރިން ރިޒާވު ސަރުކާރަށް އިތުރު ނުކުރެވޭ ކަމަށާއި، އެ ކަން ސަރުކާރުން ގަބޫލު ކުރަންޖެހޭ ކަމަށެވެ. އަދި ސަރުކާރަށް ދައްކަން ޖެހިފައިވާ ދަރަންޏަށް ބަލާއިރު ކިތަންމެ ވަރަކަށް ޓެކްސް ބޮޑުކޮށްގެން ވެސް އެ ވަރުގެ އާމްދަނީއެއް ހޯދޭނެ ކަމަށް ގަބޫލުކުރަން ދަތި ކަމަށް ރައީސް ނަޝީދު ވިދާޅުވިއެވެ. އަދި މި ހުރިހާ ކަމަކަށް އޮތް ހައްލަކީ، އެމަނިކުފާނު ވިދާޅުވިގޮތުގައި ދަރަނި ދެއްކުން ފަސްކުރުމާއި މުރާޖާ ކުރުމެވެ.