ފަލަސްތީނުގެ ހައްގުތައް ބައިނަލްއަގުވާމީ މައިދާނުގައި ކުރިއެރުވުމަށް ދިވެހިރާއްޖެއިން ފުރިހަމަ އެއްބާރުލުން ލިބޭނެ ކަމުގެ ޔަގީންކަން ޚާރިޖީ ވަޒީރު ޑރ. އަބްދުﷲ ޚަލީލް ދެއްވައިފިއެވެ.

މިނިސްޓަރު ޚަލީލް މިޔަގީންކަން ދެއްވީ ފަލަސްތީނުގެ މިނިވަންކަން އިއުލާންކުރި ދުވަހުގެ މުނާސަބަތުގައި، އެ ގައުމުގެ ބޮޑު ވަޒީރު އަދި ޚާރިޖީ ވަޒީރު، މުހައްމަދު މުސްތަފާއަށް ފޮނުއްވި މެސެޖެއްގަ އެވެ. ޚާރިޖީ ވަޒީރު ޑރ. ޚަލީލްގެ މެސެޖްގައި ދިވެހި ސަރުކާރާއި ދިވެހި ރައްޔިތުންގެ ނަމުގައި، އެ ޚާރިޖީ ވަޒީރަށާއި ފަލަސްތީނުގެ ސަރުކާރަށް އަދި ރައްޔިތުންނަށް އިހުލާސްތެރި ހެޔޮއެދުންތައް ވަނީ ފޮނުއްވާފައެވެ. ޚާރިޖީ ވަޒީރު ޑރ. ޚަލީލް ވިދާޅުވީ، ފަލަސްތީނުގެ ހައްގުތައް ބައިނަލްއަގުވާމީ މައިދާނުގައި ކުރިއެރުވުމަށް ދިވެހިރާއްޖެއިން ފުރިހަމަ އެއްބާރުލުން ލިބޭނެ ކަމަށެވެ.

"ފަލަސްޠީނުގެ ރައްޔިތުން މިނިވަން މުސްތަގިއްލު ދަޢުލަތެއް ޤާއިމުކުރުމަށް ކުރާ މިންނެތް މަސައްކަތަށް ދިވެހިރާއްޖޭގެ ފުރިހަމަ ތާޢީދު އަބަދުވެސް އޮންނާނޭކަމާއި ފަލަސްޠީނުގެ ޙައްޤުތައް ބައިނަލްއަޤްވާމީ މައިދާނުގައި ކުރިއެރުވުމަށްޓަކައި ދިވެހިރާއްޖޭގެ ފުރިހަމަ އެއްބާރުލުން ލިބޭނޭކަމުގެ ޔަޤީންކަން އަރުވަމެވެ. އަދި، އަޅުގަނޑުމެންގެ ދެ ޤައުމުގެ ދެމެދުގައި އޮންނަ އެއްބައިވަންތަކަމާއި އަޚުވަންތަކަމުގެ ގުޅުން އިތުރަށް ބަދަހިކުރުމަށް ދިވެހިރާއްޖެއިން ސާބިތުކަމާއެކު މަސައްކަތްކުރަމުން ގެންދާނޭކަމުގެ ޔަޤީންކަންވެސް އަރުވަމެވެ." ޚަލީލް ވިދާޅުވި އެވެ.