ވޭޕް ރެގިއުލޭޓް ކުރުމަކީ ކުރެވޭނެ ކަމެއް ނޫން ކަމަށާއި އެންމެ ރަނގަޅު ގޮތަކީ ވޭޕް މަނާކުރުން ކަމަށް ހެލްތު ޕްރޮޓެކްޝަން އެޖެންސީ، އެޗްޕީއޭއިން ބުނެފި އެވެ.

ޕީއެސްއެމްގެ ޕްރޮގްރާމެއްގައި އެޗްޕީއޭގެ ޑެޕިއުޓީ ޑިރެކްޓަރު ހަސަން މުހައްމަދު ވިދާޅުވީ ވޭޕް މަނާކުރުން ފަދަ ފިޔަވަޅުތައް އެޅީ ހަމައެކަނި ރާއްޖެއިން އެކަނި ނޫން ކަަމަށެވެ. އަދި އެކި ގައުމުތަކުން ވޭޕާ ގުޅޭ އެކި ފިޔަވަޅުތައް އަޅާފައިވާ ކަމަށް ވެސް ހަސަން ވިދާޅުވި އެވެ.

ހަސަން ވިދާޅުވީ ވޭޕްގެ ބާވަތްތައް ވަރަށް ގިނަ ކަމަށާއި އަދި އާންމުކޮށް ވޭޕްގައި ހުންނަ އެއްޗެއްސަކީ އެއްވެސް ގައުމެއްގެ އިދާރާއަކުން ބަލައި ޗެކުކޮށްފައި ހުންނަ އެއްޗެހި ނޫން ކަމަށެވެ.

އެހެންވެ ވޭޕްގައި ހުންނަ ތަކެތީގެ ރައްކާތެރިކަމެއް ނޯންނަ ކަމަށާއި އަދި މިހާތަނަށް ހޯދި ހޯދުންތަކުން ވެސް ވޭޕްގައި ހުންނަ ތަކެތިން ސިއްހަތަށް ގެއްލުންވާ ކަމަށް ދައްކާ ކަމަށް ހަސަން ވިދާޅުވި އެވެ.

"އެހެންވީމާ އެ ރެގިއުލޭޓް ކުރާނީތޯ ނުވަތަ އެއްކޮށް މަނާކުރާނީތޯ؟ އެހެންވީމާ ވަރަށް ގިނަ ގައުމުތަކުގައި މިހާރު މިސްރާބު މިހުރީ މި ދެންނެވި ސަބަބުތަކާހުރެ މި ރެގިއުލޭޓް ކުރުމަކީ ފަސޭހަ ކަމަކަށް ނުވާނެކަމަށް. އަދި މި ރާއްޖޭގައި ވެސް މިކަން ގޮއްސަ އޮތް ހިސާބަށް ބަލާފަ އަހަރުމެންގެ މާހައުލުގަ، ނޫނީ މި އެއްޗެހި ހުރިކަމުގައި ވަންޏާ ކުޑަކުދިން ރައްކާތެރިއެއް ނުކުރެވޭނެ، އެހެންވީމާ މި ނިންމުން މި ދެންނެވި ނަޒަރުން ވަރަށް މުހިންމު." ހަސަން ވިދާޅުވި އެވެ.،

ހަސަން އިތުރަށް ވިދާޅުވީ ސްކޫލު ކުދިން ވޭޕް ބޭނުންކުރާ މިންވަރު އިތުރުވެފައިވާ ކަމަށާއި އަދި ވޭޕްގެ ޒަރިއްޔާއިން މަސްތުވާތަކެތިވެސް ބޭނުންކުރަމުންދާކަން ފާހަގަކުރެވިފައިވާ ކަމަށެވެ.