ގަވާއިދާ ހިލާފަށް ރާއްޖެ އެތެރެވެ އުޅުނު ބޯޓެއް ޑްރޯން ބޭނުންކޮށްގެން ހޯދާފައިވާ ކަމަށް މޯލްޑިވްސް ނެޝަނަލް ޑިފެންސް ފޯސް (އެމްއެންޑީއެފް) އިން ބުނެފިއެވެ.

އެމްއެންޑީއެފުން ބުނީ ބޭރު ގައުމެއްގެ އެ އުޅަނދު ހޯދީ ސިފައިންގެ އެއާ ކޯ އާއި ކޯސްޓް ގާޑުން ހިންގި އޮޕަރޭޝަނެއްގައި ކަމަށެވެ. ބޭރުގެ އެ އުޅަނދު މިހާރު ވަނީ ކޯސްޓް ގާޑުގެ ބެލުމުގެ ދަށަށް ގެންގޮސްފައި ކަމަށް ވެސް އެމްއެންޑީއެފުން މައުލޫމާތުދެއެވެ.

އެމްއެންޑީއެފުން ހިފަހައްޓާފައިވާ އެ ބޯޓަކީ މަސްވެރިކަން ކުރުމަށް ބޭނުން ކުރާ ބޯޓެކެވެ. އެ ބޯޓާ ގުޅޭ އިތުރު ތަފްސީލެއް އަދި އެ ބޯޓުގައި ތިބީ ކިތައް ފަޅުވެރިން ކަމެއް ވެސް އެމްއެންޑީއެފުން ހާމަކޮށްފައެއް ނުވެއެވެ.