ކުރިއަށް އޮތް 2028 ވަނަ އަހަރުގެ ރިޔާސީ އިންތިޚާބުގައި އެމްޑީޕީގެ ޓިކެޓްގައި ވާދަކުރައްވަން ބޭނުންފުޅުވާ ހަތަރު ފަސް ބޭފުޅަކު ތިބި ކަމަށް ކުރީގެ ރައީސް އިބްރާހީމް މުޙައްމަދު ޞާލިޙް މިއަދު ވިދާޅުވެއްޖެއެވެ.

ރާއްޖެ ޓީވީގެ ޕްރޮގްރާމެއްގައި ވާހަކަފުޅު ދައްކަވަމުން ކުރީގެ ރައީސް އިބްރާހިމް މުޙައްމަދު ޞާލިޙް ވިދާޅުވީ، އެމްޑީޕީގެ ރިޔާސީ ޕްރައިމަރީގައި ވާދަ ކުރެއްވުމަށްޓަކައި އެ ޕާޓީގެ ރިޔާސީ ޓިކެޓަށް ޝައުވެރިވެވަޑައިގަންނަވާ ފަސް ވަރަކަށް ބޭފުޅުން އެބަތިއްބެވި ކަމަށެވެ. އެހެން ނަމަވެސް ރިޔާސީ ކެންޑިޑޭޓުންނަށް ވާން ޝައުގުވެރިކަން ފާޅުކޮށްފައިވަނީ ކޮން ބޭފުޅުންނެއް ކަމެއް ރައީސް ސާލިޙް ހާމައެއް ނުކުރަށްވައެވެ. އެމަނިކުފާނު ވަނީ ރިޔާސީ ޓިކެޓަށް ޝައުގުވެރިކަން ހުރި ބޭފުޅުން ޕާޓީ ހިންގުމަައިގެން ކުރިއަށް ދިޔުމަށް ގޮވާލައްވާފައެެވެ.

ރިޔާސީ އިންތިހާބުގައި ވާދަކުރަށްވާނެތޯ ސުވާލު ދެންނެވުމުން ރައީސް ސާލިޙް އެސުވާލަށް ސީދާ ސާފު ޖަވާބެއް ނުދެއްވިއެވެ. ރައީސް ސާލިޙް ވިދާޅުވީ އެމަނިކުފާނުގެ ސިޔާސީ ހަޔާތާއި ކުރިމަގާ ބެހޭގޮތުން ޕާޓީގެ އިސްވެރިންނާ ވާހަކަދައްކަވާފައި ވާނެ ކަމަށެވެ. އަދި އެމަނިކުފާނުގެ ނިންމުންވެސް މިހާރު ޕާޓީގެ ލީޑާޝިޕަށް އަންގަވާފައިވާ ކަމަށް ސާލިޙް ވިދާޅުވިއެވެ. ސާލިޙް ވިދާޅުވީ އެމަނިކުފާނުގެ ނިންމުން ހާމަކުރައްވައިފިނަމަ ޕާޓީއަށް ލިބޭ ގެއްލުން ބޮޑުވެދާނެ ކަމަށެވެ.

ރިޔާސީ އިންތިޚާބުގައި ވާދަކުރައްވަން އެމްޑީޕީގެ ފަސް ބޭފުޅަކު ޝައުގުވެރިކަން ފާޅުކުރައްވާފައިވާކަން ރައީސް ޞާލިޙް ހާމަކުރެއްވި އިރު، އެ އިންތިޚާބުގައި ވާދަކުރައްވާނެ ކަމަށް ކުރީގެ ރައީސް ޔާމީން ވެސް ވަނީ އިއުލާންކުރައްވާފައެވެ.

އަދި އެމްޑީޕީގެ ރިޔާސީ ޓިކެޓަށް އެޕާޓީގެ ރައީސް ޝާހިދާއި ޗެއާޕާސަން ފައްޔާޒުގެ އިތުރުން މާލޭގެ މޭޔަރު އާޒިމް ވެސް ވާދަކުރައްވާނެ ކަމުގެ އަޑުތައް ވަނީ ފެތުރިފައެވެ.