މި ސަރުކާރަށް ކުރިމަތިވި އެންމެ ބޮޑު ގޮންޖެހުމަކީ ރާއްޖޭގެ އިޤުތިސާދީ ހާލަތު ރަނގަޅުކުރުން ކަމަށް ނައިބު ރައީސް އަލްއުސްތާޛު ޙުސައިން މުޙައްމަދު ލަޠީފް ވިދާޅުވެއްޖެއެވެ.

ސަންގު ޓީވީއަށް ދެއްވި އިންޓަވިއުއެއްގައި ނައިބު ރައީސް ވަނީ ދިވެހިރާއްޖޭގެ އިޤުތިސާދީ ހާލަތަށް އަލިއަޅުއްވާލައްވައި ވާހަކަފުޅުދައްކަވަމުން މި ވޭތުވެދިޔަ އެއް އަހަރު ދުވަހުގެ ތެރޭގައި ރާއްޖޭގެ އިޤުތިސާދީ ހާލަތު ރަނގަޅުކުރުމަށް ރައީސް ޑރ. މުޙައްމަދު މުއިއްޒުގެ ސަރުކާރުން ކުރެއްވި މަސައްކަތްތަކުގެ މައްޗަށް އަލިއަޅުއްވާލައްވާފައެވެ.

ނައިބު ރައީސް ވިދާޅުވީ ޒިންމާދާރު އިދިކޮޅު ސިޔާސީ ޕާޓީއެއްގެ ގޮތުގައި އޭރު ދައްކަމުން އައި ވާހަކަތަކާއެކު ސަރުކާރާއި ހަވާލުވެވަޑައިގެން، އެންމެ ބޮޑު ގޮންޖެހުމަކަށް ކުރިމަތިވި ކަމަކީ ރާއްޖޭގެ އިޤުތިސާދީ ހާލަތު ރަނގަޅުކުރުން ކަމަށެވެ.

ވެރިކަމާއި ހަވާލުވެވަޑައިގެން، ރައީސް އެންމެ ފުރަތަމަވެސް ކުރެއްވި މަސައްކަތްޕުޅަކީ އެ ހާލަތު ރަނގަޅުކުރުން ކަމަށާއި އެގޮތުން އެންމެ ފުރަތަމަ ކުރެއްވި މަސައްކަތްޕުޅަކީ މާލީ ނިޒާމުގައި ހުރި ގޮންޖެހުންތައް ނައްތާލުން ކަމަށް ނައިބު ރައީސް ވިދާޅުވިއެވެ. އަދި ދަރަނިތައް ރީސްޓްރަކްޗަރކޮށް، ތަރުތީބުކުރައްވައި އެކުލަވާލެއްވުމަށްފަހު ރައީސް ވަރަށް ބޮޑަށް އިސްކަމެއް ދެއްވައިގެން މަސައްކަތް ކުރެއްވި ކަމަށް އެމަނިކުފާނު ވިދާޅުވިއެވެ.

ސަރުކާރަށް އެއް އަހަރު ފުރުމާ ގުޅިގެން ދެއްވި މި އިންޓަވިއުގައި ނައިބު ރައީސް ވަނީ މި ސަރުކާރުން ރާއްޖޭގެ އިގުތިސާދު ރަނގަޅު ކުރެއްވުމަށް ކުރެއްވި މަސައްކަތްތަކުގެ ތެރެއިން ރާއްޖޭގެ ކުންފުނިތައް އޮތް ހާލަތުން އަރައިގަތުމަށްޓަކައި ބައިވަރު މަސައްކަތްތަކެއް ކުރެވުނުކަން ފާހަގަކުރައްވާފައެވެ.