އަރަބިއްޔާ ސްކޫލުގެ އާ އިމާރާތް އަޅަން ރަޝީދު ކާޕެންޓްރީ އެންޑް ކޮންސްޓްރަކްޝަން (އާރުސީސީ)އާ ހަވާލުކޮށްފި އެވެ.

އަރަބިއްޔާ ސްކޫލުގެ މަސައްކަތް 100 ދުވަސް ތެރޭގައި ފެށުމަކީ ރައީސް ޑރ. މުހައްމަދު މުއިއްޒުގެ ރިޔާސީ ވައުދެވެ. އެހެން ނަމަވެސް އެގޮތަށް އެކަން ކުރެވިފައެއް ނުވެއެވެ.

އެޑިއުކޭޝަން މިނިސްޓަރު ޑރ. އިސްމާއިލް ޝަފީއު މި މަހުގެ ހަވަނަ ދުވަހު ވިދާޅުވީ ކުރިން ބުނިގޮތަށް އެ މަސައްކަތް ނުފެށި އަރަބިއްޔާ ސްކޫލުގެ އާ އިމާރާތުގެ މަސައްކަތް ލަސްވެގެން އުޅެނީ އެކަމަށް 80 މިލިއަން ރުފިޔާއަށްވުރެ ބޮޑުއެއްޗެއް އިތުރަށް ހޭދަކުރަން ޖެޙޭތީ ކަމަށެވެ.

އޭގެ ފަހުން މިއަދު އެޑިއުކޭޝަން މިނިސްޓްރީން ބުނީ ނިމިގެން ދިޔަ ހަފްތާގައި އާ އިމާރާތް އަޅަން އާރުސީސީއާ ހަވާލުކޮށް މިހާރު އަމަލީ މަސައްކަތް ވެސް ފަށައިފައިވާ ކަމަށެވެ. ޑިޒައިން އެންޑް ބިލްޑު އުސޫލުން އަރަބިއްޔާ ސްކޫލް ޢިމާރާތް ކުރުމުގެ މަސައްކަތް، އެ ކުންފުންޏާ ހަވާލުކޮށްފައިވަނީ 152.9 މިލިއަން ރުފިޔާއަށް 540 ދުވަހުގެ ތެރޭގައި ނިންމާ ގޮތަށެވެ.

އެ ސްކޫލުގައި 40 ކްލާސްރޫމާއި، ބޭސްމެންޓްގައި އަންޑަރ ގްރައުންޑް ޕާރކިންގް ޒޯނަކާއި، ޓަރފް ދަނޑެއް ހިމެނޭނެ ކަމަށާއި އަދި އެ ސްކޫލު ޢިމާރާތްކުރަނީ ޒަމާނީކޮށް، އޭސީ އަދި ސޯލާޕެނަލް ހަރުކުރެވޭނެ ގޮތަށް ކަަމަށް ވެސް މިނިސްޓްރީން ބުނެފައި ވެއެވެ.

ކުރީ ސަރުކާރުގައި ޖަމާލުއްދީންގެ ބާ އިމާރާތުގައި އަރަބިއްޔާގެ އާ އިމާރަތް އަޅަން ނިންމި ނަމަވެސް މި ސަރުކާރުން އާ އިމާރާތް އަޅަން ނިންމާފައި ވަނީ ކުރީގެ ކުނިކޮށި ހުރި ބިން ކަމަށްވާ 368 ނަންބަރު ކޮށީގަ އެވެ.