ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުގައި ގެދޮރުވެރިޔާ ސްކީމްގެ ދަށުން ދޫކުރި، 4000 ފްލެޓު ލިބޭކަމަށް ލިސްޓު ކުރި މީހުންގެ ތެރޭގައި ފޯމު ހުށަނާޅައި ހަމައެކަނި އައިޑީކާޑު ދައްކައިގެން ވެސް ފްލެޓު ދޫކޮށްފައި އެބަހުރިކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިރޭ ވިދާޅުވެއްޖެ އެވެ.

ރައީސް މިހެން ވިދާޅުވީ ސަރުކާރަށް އަހަރު ފުރުމާ ގުޅިގެން މިރޭ ބޭއްވި "ހަފުތާ 52 ފާހަގަ ކުރުމުގެ ރަސްމިއްޔާތު"ގައި ވާހަކަފުޅު ދައްކަވަމުންނެވެ.

ރައީސް ޑރ. މުޙައްމަދު މުޢިއްޒު ވިދާޅުވީ، ފްލެޓު ލިސްޓާ ގުޅިގެން އޭސީސީން ބެލި ބެލުމުން އުސޫލާ ޚިލާފަށް ކޮށްފައި ހުރި ކަންކަން ފާހަގަވެފައި ވާކަމަށެވެ. އެގޮތުން މިދިޔަ ސަރުކާރުގައި ގެދޮރުވެރިން ކޮމިޓީގައި ހިމެނޭ ސިޔާސީ ފަރާތްތަކަށް ފްލެޓު ލިބޭގޮތަށް ޕޮއިންޓު އޮޅުވައިލާފައި ވާކަމަށާއި ފޯމް ހުށަނާޅައި ހަމައެކަނި އައިޑީކާޑް ދިއްކޮށްލި މީހުންނަށް ފުލެޓް ދޫކޮށްފައިވާ ކަމަށް ރައީސް މުޢިއްޒު ވިދާޅުވިއެވެ.

"ނުފޫޒު ގަދަ އާއިލާތަކުގެ، އެއް އާއިލާއެއްގެ އެތައް މެމްބަރުންނަށް ފްލެޓު ދީފައި އެބަހުރި، ޕޯޓަލްއަށް ހުށަހެޅި ފޯމުތަކުގެ އިތުރަށް ފްލެޓުދީފައި އެބަހުރި، މިއީކޮށްފައި ހުރި ކަންތައް، ފޯމު ހުށަނާޅައި، ހަމައެކަނި އައިޑީކާޑަށް ވެސް ފްލެޓުދީފައި އެބަހުރި، އަދި އައިޑީކާޑުގެ އެއްފަޅި، ދެން އެބޭފުޅުން ކޮން ވާހަކައެއްތޯ މި ދައްކަނީ ޕޯޓަލްގެ ބެކްއެންޑުން މާކްޝީޓު ބަދަލުކޮށްފައި އެބަހުރި،" ރައީސް ވިދާޅުވިއެވެ.

ރައީސް އިތުރަށް ވިދާޅުވީ ސަރުކާރުން އިއުލާނު ކުރި 4000 ފްލެޓު ލިސްޓަށް އެއްވެސް ނުފޫޒެއް ނުފޯރުވޭނެ ކަމަށެވެ. އަދި ފްލެޓު ލިސްޓުގެ މަސައްކަތް ލަސްވަނީ ލިސްޓުގެ ސައްހަކަން ޔަގީންކުރާތީ ކަމަށް ރައީސް މުޢިއްޒު ވިދާޅުވިއެވެ.