މުސާރައިގެ ކުރިއެރުން ނުލިބޭ ހުރިހާ މުވައްޒަފުންނަށް 2026 ވަނަ އަހަރު މުސާރައިގެ ކުރިއެރުން ލިބިގެންދާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

މި ސަރުކާރަށް 1 އަހަރު ފުރުމާއި ގުޅިގެން އެކަން ފާހަގަ ކުރުމަށް މިރޭ ބޭއްވި ޖަލްސާގައި ވާހަކަފުޅު ދައްކަވަމުން ރައީސް ވިދާޅުވީ، މުސާރަތައް އެއްހަމަ ކުރުމުގެ މަސައްކަތްތަކުގެ ތެރެއިން ސިވިލް ސާވިސް މުވައްޒަފުންގެ ތެރެއިން މިހާތަނަށް ޕޭ ހާމަނައިޒްކޮށްފައި ނުވާ ހުރިހާ މުވައްޒަފުންނާއި ޝަރުއީ ދާއިރާގައި މަސައްކަތްކުރާ މުވައްޒަފުންގެ މުސާރަތަކަށް އަންނަ އަހަރު ބަދަލު ގެންނަވާނެ ކަމަށެވެ.

އަދި އެކަމަށް ބަޖެޓުގައި 500 މިލިއަން ރުފިޔާ ހިމަނާފައިވާނޭކަމަށް ރައީސް ވިދާޅުވިއެވެ.

ރައީސް ވިދާޅުވީ، އޭގެ އިތުރަށް ދެން ތިބޭ ދައުލަތުގެ ހުރިހާ މުވައްޒަފުންގެ މުސާރަތައް 2026 ވަނަ އަހަރުގެ ބަޖެޓުގައި ހިމަނުއްވައިގެން ބޮޑު ކުރައްވާނެކަމަށެވެ.

"ޕޭ ހާމަނައިޒް ކުރުމުގެ ނިޒާމުގެ ތެރެއިން، މި އަންނަ އަހަރު މުސާރަ ބޮޑު ކުރާނަން މިހާރު މުސާރަ ބޮޑުނުވެ ތިބި ހުރިހާ ސިވިލް ސާވިސް މުވައްޒަފުންގެ. ހަމަ އެއާ އެކީގައި ޖުޑީޝަރީގައި މަސައްކަތްކުރާ ހުރިހާ މުވައްޒަފުންގެ ވެސް މުސާރަ މި އަންނަ އަހަރު ބޮޑުވާނެ،" ރައީސް މިރޭ ވިދާޅުވިއެެވެ.

މުސާރަތައް ބޮޑު ކުރައްވާނެކަމަށް ރައީސް ވިދާޅުވިއިރު އެމަނިކުފާނު ވަނީ އާމްދަނީ އިތުރު ކުރުމަށް ކުރައްވާނެ ގިނަ މަސައްކަތްތަކެއް ވެސް ފާހަގަ ކުރައްވާފައެވެ.

ހާއްސަ ގޮތެއްގައި އިގުތިސާދު ކޮޅަށްޖަހައި ޑޮލަރުގެ ތާށިކަން ކުޑަކުރުމަށް އަލަށް ހަދާ ގަވާއިދުގެ މަސައްކަތް ހުއްޓަވާ ނުލައްވާނެކަމަށް ރައީސް މިރޭ ވިދާޅުވިއެވެ.