ދުވަހަކުވެސް މައުލޫމާތު ހާމަނުކުރާ ވަރަށް މި ސަރުކާރުން މައުލޫމާތު ހާމަކުރަމުންދާ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.

ސަރުކާރަށް އަހަރެއް ފުރުމާ ގުޅިގެން ރޭ ބޭއްވި ހާއްސަ ހަފްލާގައި ރައީސް މުއިއްޒު ވަނީ ދެފުށް ފެންނަ ގޮތަށް ކަންކަން ހާމަކުރަން މި ސަރުކާރުން މަސައްކަތް ކުރާކަން ފާހަގަ ކުރައްވައިފަ އެވެ.

އެގޮތުން މައުލޫމާތު ލިބިދިނުމާއި ހޯދުމުގެ ހައްގުގެ ދަށުން ހުށަހެޅި އާރްޓީއައިގެ ތެރެއިން 91 ޕަސެންޓް އާރްޓީއައިއަށް ސަރުކާރުން ޖަވާބުދާރީވެފައިވާ ކަމަށް ވެސް އެމަނިކުފާނު ވިދާޅުވި އެވެ.

ހަމަ އެއާއެކު ސަރުކާރުގެ ވެބަސައިޓުގެ ނަމުގައި ވެބަސައިޓެއް ގާއިމުކުރައްވާފައި ވާނެކަމަށް އެމަނިކުފާނު ވިދާޅުވި އެވެ. ރައީސް އެ އިޝާރާތް ކުރެއްވީ "ސަރުކާރު"ގެ ނަމުގައި މިހާރު އޮންލައިންކޮށް ނެރެމުންދާ ނޫހަށެވެ. ސަރުކާރުގެ ހުރިހާ ވުޒާރާއެއްގައި ހިނގާ ކަންކަމުގެ އެންމެ ފަހުގެ އަޕްޑޭޓްތައް އެ ވެބްސައިޓްގައި ފެންނަން ހުރެއެވެ.

ރައީސް ރޭ އިތުރަށް ވިދާޅުވީ ވަޒީރުންގެ މަޖިލީހުގެ ނިންމެވުންތަކަށް ވެސް ވެބްސައިޓެއް ހައްދަވާފައިވާ ކަމަށެވެ.

އޭގެ އިތުރުން 791 ފަހަރު ވުޒާރާތަކުންނާއި ވަޒީރުން އެކި މީޑިއާތަކަށް މަޢުލޫމާތު ދީފައިވާކަމަށާއި 73 ނޫސްވެރިންގެ ބައްދަލުވުން ބާއްވާފައިވާކަމުގައި އެމަނިކުފާނު ވިދާޅުވިއެވެ. އަދި ރައްޔިތުންގެ އަޑު ޕޯޓަލުންވެސް ރައްޔިތުންގެ ސުވާލުތަކަށް ޖަވާބު ދާރީވަމުންގެންދަވާކަމުގައި އެމަނިކުފާނު ވިދާޅުވިއެވެ.