އަމިއްލަ އިންޝުއަރެންސް އޮންނަ މީހުންނަށް އާސަންދަ ހިދުމަތް ދިނުމުގައި ގެނައި ބަދަލާއި ގުޅިގެން ރައްޔިތުން އަތުން މިހާރު ނުނަގާ ފައިސާއެއް ނުނަގާނެ ކަމަށް ރައީސް ޑރ. މުޙައްމަދު މުޢިއްޒު ރޭ ވިދާޅުވެއްޖެއެެވެ.

ރައީސް މިހެން ވިދާޅުވީ ސަރުކާރަށް އެއް އަހަރު ފުރުން ފާހަގަކުރުމަށް، "ހަފުތާ 52- ރައްޔިތުންނާއެކު ކުރިއަށް" މިނަމުގައި ރޭ ބޭއްވި ޚާއްޞަ އިހުތިފާލުގައި ރައްޔިތުންނާ މުޚާޠަބުކުރައްވަމުންނެވެ.

ރައީސް ޑރ. މުޙައްމަދު މުޢިއްޒު ވިދާޅުވީ، ރައްޔިތުންނަށް ސިއްޙީ ފަރުވާދޭ އާސަންދަ ނިޒާމް މިހާރު އޮތީ ބޮއްސުންލާފައިކަމަށެވެ. އެގޮތުން ޒަމާންތަކެއް ވަންދެން އާންމު ރައްޔިތުންނަށް ދޫކުރާ ބޭހުގެ ވިޔަފާރިކޮށްގެން ރައްޔިތުންގެ ފައިސާ އިން ބަޔަކު ދިޔައީ މުއްސަނދިވަމުން ކަމަށް ރައީސް މުޢިއްޒު ވިދާޅުވިއެވެ.

"މިދަންނަވާ ވާހަކައަކީ އާދައިގެ ރަށެއްގައި ވެސް 14 ފޫޓް 12 ފޫޓް ތަންކޮޅެއް ނަގައިގެން ބޭސް ފިހާރަ އެއް ހަދާ މީހާ މާގިނަ ދުވަހެއް ނުވާނެ މަސްދޯނި ބަންނާނެ، ބޮޑެތި ގެ ގަަންނާނެ ކިހިނެތްތޯ މިވަނީ؟ އާސަންދައިގެ ތެރެއިން މިކުރާކަމަކީ އެތައް ގުނައެެއް މައްޗަށް ޕްރޮފިޓް ޕަސެންޓޭޖް ޖައްސާލައިގެން އާސަންދަ ތެރެއިން ރައްޔިތުންގެ ފައިސާ، ރައްޔިތުންނަށް ކަންކަމުގައި ހެޔޮ ގޮތުގައި ހަރަދުކުރެވެން ހުރި ފަައިސާ ހޯދަނީ ނުގަވާއިދުން. އެހެން ނަމަވެސް ނިޒާމްގެ ތެރެއިން، މިކަން މިހެން ހިނގުމުގެ ސަބަބުން އާސަންދަ ނިޒާމް މިއޮތީ ބޮއްސުންލާފައި،" އާސަންދަ ނިޒާމްގެ ތެރެއިން ނާޖާއިޒު ފައިދާ ހޯދަމުންދިޔަ ގޮތުގެ ތަފްސީލް ހާމަކުރަށްވައި ރައީސް މުޢިއްޒު ވިދާޅުވިއެވެ.

މީގެއިތުރުން ރައީސް މުޢިއްޒު ވިދާޅުވީ، އާސަންދަ ނިޒާމް އިސްލާހުކުރާ ވާހަކަ ސަރުކާރުން ދައްކަނީ އެނިޒާމްގެ ތެރެއިން ބަޔަކު ނަގަމުންގެންދާ ނާޖާއިޒު ފައިދާތައް ހުއްޓުވައި ބޭކާރު ޚަރަދު ކުޑަކުރުމަށް ކަމަށެވެ. އެމަނިކުފާނު ވިދާޅުވީ އާސަންދައަށް އިތުރު ބަދަލެއް ނުގެންނަ ކަމަށާއި އާސަންދައަށް ބަޖެޓުގައި ކަނޑައަޅާފައިވާ ފައިސާ މަދުކުރަން ނިންމާފައި ނުވާ ކަމަށެވެ. އަދި އެ ނިޒާމަށް ގެންނަ ބަދަލުގެ ސަބަބުން ރައްޔިތުންގެ އަތުން އިތުރަށް ފައިސާ ދައްކަންނުޖެހޭނެ ކަމަށް ރައީސް މުޢިއްޒު ވިދާޅުވިއެވެ.

"އެއްގޮތަކަށްވެސް ރައްޔިތުން ތިކުރަށްވާ ބޭސްފަރުވާ އަށް އެއްވެސް ކަހަލަ ބަދަލެއް ނާންނާނެ، ރައްޔިތުންގެ އަތުންނެއް އަޅުގަނޑުމެން ކުރިއަށް އޮތް އަހަރުތަކުގައި މިއަންނަ އަހަރުން ބަޖެޓުގައި ވެސް މިހާރަކު ނުނަގާ ފައިސާއެއް ނުނަގާނަން، ވަރަށް ސާފުކޮށް މިދަންނަވަނީ ރައްޔިތުން ދައްކަންޖެހޭ އެއްޗެއް ނޯންނާނެ މިހާރު އޮތް ސިސްޓަމްގެ ތެރެއިން ދާނީ ހަމަ އެނިޒާމް އޮންނާނީ،" ރައީސް މުޢިއްޒު ވިދާޅުވިއެވެ.

ރައީސް އިތުރަށް ވިދާޅުވީ ދުނިޔޭގެ އެހެން ގައުމުތަކާއި އަޅާބަލާއިރު ރާއްޖޭގައި ބޭސް ވިއްކަނީ 15 ގުނަ އަގުބޮޑުކޮށް ކަމަށެެވެ. ރައީސް ވިދާޅުވީ އެންމެ އިންޖެކްޝަނަކަަށް އެއްއަހަރުގެ ތެރޭގައި 33 މިލިއަން ރުފިޔާ ދައުލަތުގެ މާލިއްޔާ އިން ޚަރަދުކުރާ ކަމަށެވެ. ރައީސް ވިދާޅުވީ ބަލްކު ޕްރޮކިއުމަންޓް ކޮށް ބަލްކު ކޮށް ސަރުކާރުން ބޭސް ގަނެގެން އެންމެ ޒަމާނީ ގައުމުތަކުގައި ހުންނަ އެންމެ ފެންވަރު ރަނގަޅު ބޭސް ގެނެސްގެން އެ ބޭސް ފޯރުކޮށްދިނުމަށް މަސައްކަތް ކުރަމުންދާ ކަމަށެެވެ. ރައީސް ވިދާޅުވީ އޭގެތެރެއިން ބޭހުގެ އަގު ކޮންޓްރޯލް ކުރެވޭނެ ކަމަށެވެެ.

އާސަންދައަށް ގެންނަ ބަދަލާއެކު ދައުލަތުގެ ބަޖެޓުން އަހަރަކު 550 މިިލިއަން ރުފިޔާ ސަލާމަތްކުރެވޭނެ ކަމަށް ރައީސް މުޢިއްޒު ވިދާޅުވިއެވެ.